Рингларни титратган залворли зарбалар

Ўзбекистон бугунги кунда барча соҳаларда жадал ривожланиб келаётган мамлакат ҳисобланади. Бу борада спортчиларимизнинг ҳам ҳиссаси катта. Хусусан, бугунги кунда мамлакатимиз атлетлари жаҳон ареналарида ватанимиз шарафини ҳимоя қилиб, мамлакатимиз байроғини юксакларга кўтармоқдалар.

Биргина бокс соҳасида вакилларимизнинг ютуқлари мақтаса арзигулик. Ҳозирда ўзбек ҳаваскор бокс мактаби дунёда 1- ўринда эътироф этилмоқда. Аъзал-аъзалдан бокс спорт тури бўйича юртимизда улкан номлар етишиб чиққан. Хусусан Марказий Осиё чемпиони, Осиё чемпиони, жаҳон чемпиони, профессионал боксда супероғир вазнда WBA камари соҳиби Руслан Чагаев. 2 карра Осиё чемпиони, Осиё ўйинлари ғолиби, жаҳон чемпиони, Сидней олимпиадаси чемпиони Муҳаммадқодир Абдуллаев.

Профессионал боксда биринчи Ўзбекистонлик чемпион, ўзининг WBO камарини 17 бора муваффақиятли ҳимоя қила олган Артур Григорян ва бошқа кўплаб боксчиларимиз шулар жумласидандир. Ҳозирги кунда ҳам бу боксчиларимизга муносиб ёшлар етишиб чиқмоқда.

Келинг ҳаваскор боксчиларимизнинг ёрқин ғалабаларини эсга оламиз. 2016 йили Бразилиянинг Рио-де-Жанейро шаҳрида бўлиб ўтган ёзги Олимпиада ўйинлари ўзбек бокси тарихидаги энг катта туб бурилиш бўлди, десак муболаға бўлмайди. Ўзбекистон делегацияси ушбу мусобақада жами 13 медални қўлган киритган бўлса, шулардан 7 таси боксчиларимиз ҳиссасига тўғри келади.

Мусобақаларда 49 кг вазн тоифасида иштирок этган Ҳасанбой Дўсматов биринчилардан бўлиб олтин медалга эга чиққан бўлса, кейинчалик амалдаги жаҳон чемпионларини ва Олимпиада чемпионларини мағлубиятга учратган, 52 кг вазнда Шаҳобиддин Зоиров, 64 кг да Фазлиддин Ғойибназаров Олимпия чемпионлигини қўлга киритди. 69 кг вазнда Шаҳрам Ғиёсов ва 75 кгда Бектемир Мелиқўзиев кумуш медални, 56 кгда Муроджон Аҳмадалиев ва -91 кг вазнда Рустам Тўлаганов бронзани қўлга киритиб, байроғимизни юксакларга кўтаришган эди. Ўша йили Ҳасанбой Дўсматов "Йилнинг энг яхши боксчиси" деб топилган ва бунинг устига "Вела Баркер" совринини ҳам қўлга киритганди. Кейинчалик, 2017 йили Тошкент мезбонлик қилган Осиё чемпионатида вакиллларимиз 9 та олтинни қўлга киритиб, мутлоқ рекордни қайд эта олгандилар.

Орадан бир оз муддат ўтиб, олмон юртида ташкил этилган жаҳон чемпионатида ҳам муваффақиятли иштирок этиб, 1 та олтин, 3 та кумуш ва 2 та бронза билан умумжамоа ҳисобида Кубадан кейин 2-ўринни қўлга киритишди. Бундай боксчилар билан бир қанча машҳур промоутерлик компаниялар ишлашни хоҳлайди албатта... Гарчи, профессионал боксда ҳозирда чемпионлик даражасига чиқиш қийин бўлсада, бир қанча чармқўлқоп усталаримиз бунга яқин келиб улгуришди. Ҳаваскор йўналишдан фарқли равишда профессионал боксда 17 вазн тоифасида 4 та ташкилот (WBA, IBF, WBC, WBO) чемпионлик камарлари учун босқичма-босқич рейтинг ва даъвогарлик жангларидан сўнг, чемпионлик учун рингга кўтарилиш имкониятини қўлга киритишади.

Ҳозирда, Шаҳрам Ғиёсов, Исроил Мадримов, Муроджон Аҳмадалиев, Бектемир Мелиқўзиев, Ҳасанбой Дўсматов каби боксчиларимиз Россиянинг "Мир Бокса" (World of Boxing) компанияси билан, Фазлиддин Ғойибназаров ва Қудратилло Абдуқаҳҳоров дунёга машҳур "Top rank", Шоҳжаҳон Эргашев АҚШнинг "Salita Promotion", Азизбек Абдуғофуров Англиянинг "Quensberry Promotion", Баҳодир Жалолов ва Элнур Абдураимов эса "Dibella Entertainment" промоутерлик компаниялари, Рустам Тўлаганов, Одил Арслонов, Шукужон Раҳимов ва Улуғбек Мубинов Россиянинг "Patriot Boxing" мижози ҳисобланишади.

Уларнинг профессионал фаолиятига бирма-бир тўхталиб ўтсак:

Супер ўрта вазнда (76 кг) боксчимиз Азизбек Абдуғофуров бугунгача 13 жанг ўтказиб, барчасида рақибларини мағлубиятга учратди. У ҳозирда WBC Silver камари соҳиби ва WBC рейтингида 2-ўринда бормоқда. Келаси йили унинг чемпионлик жангига чиқишини умид қилиб қоламиз. Ушбу вазндаги яна бир иқтидорли боксчимиз 2 карра Олимпиада ўйинлари совриндори (Ўсмирлар Олимпиадаси ҳам назарда тутилган), жаҳон чемпионати финалчиси, 2 карра Осиё чемпиони Бектемир Мелиқўзиев ҳам проффессионал боксда шу йилнинг ўзида 4 жанг ўтказиб, барчасида рақибларини мағлубиятга учратган. У "Golden Boy Promotion" билан шартномага эга ва 2020 йили камар учун рингга кўтарилиши кутилмоқда. Унинг кейинги жанги 14 февраль куни АҚШда Антонио Перибанга қарши бўлиши кутилмоқда.

Супер ярим ўрта (69 кг) вазнда бошқа бир ҳамюртимиз Исроил Мадримов анчагина шов-шувли жанглар ўтказди. Ҳозиргача, у 4 та жанг (барчаси 10 раундлик) ўтказиб,  муддатидан аввал ғалабаларга эришган. 1-жангидаёқ WBA Intercontinental камарига эга чиқди. 2-жангида ўзидан анча тажрибали проффессионал рингда 26 та жанг ўтказиб, уларнинг 24 тасида ғалабага эришган Фрэнк Рохасни чуқур нокаутга учратди. Ҳозирча сўнги бўлиб турган Алехандро Баррерага қарши кечган тўқнашувда эса афсонавий Геннадий Головкин билан бир кечада 2-асосий жангда рингга чиқиб анча обрў қозонди. Ҳозирда, у WBA рейтингида 3-ўринда бормоқда. У 29 февралда Чарли Наваррога қарши WBA Eliminator жангида рингга чиқади.

Ярим ўрта вазн (66 кг) тоифасидаги вакилимиз Қудратилло Абдуқаҳҳоров ҳам 17 жангдан, барчасида рақибларини мағлубиятга учратган. 2019 йил у учун анча омадли йил бўлди. Март ойида Қудратилло IBF чемпионлик камари учун саралаш жангида иштирок этди ва япониялик Кейта Обарадан устун келиб, ҳозирда енгилмас IBF чемпионлик камари соҳиби Эррол Спенс билан чемпионлик учун жанг қилиш ҳуқуқини қўлга киритди. Кейинги жангида у собиқ жаҳон чемпиони америкалик Луис Коллазони ҳакамларнинг бир овоздан қарори билан очколар ҳисобида мағлубиятга учратди ва камар даъвогарлигига муносиб эканлигини яна бир бора исботлади. Аммо октябрь ойида Эррол Спенс автоҳалокатга учрагани боис Қудратилло кейинги жангини 2020 йилнинг 22 февралида IBF нинг вақтинчалик чемпионлик камари учун россиялик Сергей Липинец билан ўтказиш эҳтимоли бор.

Супер енгил вазнда (63 кг) бирданига 2 боксчимиз юқори рейтингларни банд этишган. Улар Шаҳрам Ғиёсов ва Шоҳжаҳон Эргашевдир. Шаҳрам Ғиёсов охирги жангида собиқ жаҳон чемпиони Дарлей Пересни 40 сония ичида нокаутга учратиши катта шов-шувга сабаб бўлган эди. У ҳозирга қадар ўтказган 9 жангидан 7 тасида рақибларини муддатидан аввал таслим этишга эришган. Ҳозирда Шаҳрам Ғиёсов WBA рейтингида 7-ўринда қайд этилган. Нокаутчи боксчимиз Шоҳжаҳон Эргашев 18 жангининг 16 тасида рақибларини рингга қулатган. Охирги уч жангида анчагина кучли рақиблари Майкл Фокс (21 ғалаба, 1 мағлубият) ва Абдиэль Рамиресни (24 ғалаба, 5 мағлубият) ва Андриан Эстрелларсни мағлуб этишга эришди.

Иккинчи суперенгил вазн (55,3 кг) ҳамюртимиз Муроджон Аҳмадалиев IBF ва WBA камарлари учун Даниэль Роман билан бор-йўғи 7 жангидан сўнг эришди. Жанг 30 январь куни АҚШда бўлиб ўтди ва Аҳмадалиев очколар ҳисобида рақибидан устун келди.

Бундан ташқари, Баҳодир Жалолов ва Элнур Абдураимов ҳам бир қанча жанглар ўтказди ва ғалабага эришдилар.

Бу ҳали ҳаммаси эмас. 2019 йилнинг 9-21 сентябрь кунлари Россияда бўлиб ўтган жаҳон чемпионатида ҳам вакилларимиз муносиб иштирок этишди ва 3 та олтин (+91 кг Баҳодир Жалолов, 56 кг Миразизбек Мирзаҳалилов, 52 кг Шаҳобиддин Зоиров), 1 та кумуш (81 кг Дилшодбек Рўзметов) ва 1 та бронза ( 69 кг Бобоусмон Ботуров) медалга эга чиққан ҳолда умумжамоа ҳисобида 1-ўринни эгаллашди. Боксчиларимиз ва мураббийлар Ўзбекистонда муносиб кутиб олинди ва катта миқдорда пул мукофотлари ҳамда 1-ўрин соҳибларига "Трэкер", иккинчи ва учинчи ўрин эгаларига "Жентра" автомобиллари совға қилинди. Ҳозирда, улар 2020 йилги Токио олимпиадаси учун тайёргарликни бошлаб юборишган. Уларга улкан омад ва зафарлар тилаб қоламиз.

Муаллиф: Жалол Ахмедов.