Роналду Мессини “тахт”дан ағдарди

Европа чемпионлар лигаси гуруҳ босқичи 5-тур учрашувида “Ювентус” ўз майдонида Киевнинг “Динамо” жамоасини 3:0 ҳисобида мағлубиятга учратди.

Ўйинда рақиб дарвозасини ишғол қилган Криштиану Роналду уй учрашувларида гол уриш бўйича “Барселона” сардори Лионель Месси рекордини йўққа чиқарди. Айни пайтда Роналдунинг “кўҳна қитъа”нинг энг нуфузли мусобақасида мезбон сифатида урган голлари сони 71 тани ташкил қилмоқда.

Шунингдек, “Динамо” дарвозасига киритилган тўп Роналду фаолиятидаги 750-гол бўлди. Портагулиялик ҳужумчи фаолиятини давом эттираётган футболчилар орасида бу кўрсаткич бўйича яққол пешқадам ҳисобланади.

Чемпионлар лигасининг навбатдаги турида “Ювентус” сафарда “Барселона” билан учрашади. 8 декабрга белгиланган ўйинда Месси ва Роналду дуэли бўлиши кутилмоқда.