Самбочи Нилуфар Раҳмонова карантин вақтини қандай ўтказмоқда?

  Мамлакатимиз спортчиларининг карантин ҳолатида қандай фойдали машғулотлар билан банд эканлиги ва  ўз ўрнида қай тарзда вақтини унумли ўтказиш кераклиги борасидаги тавсияларини бериб бораётган эдик. Бу анъанани давом эттирган ҳолда, навбатдаги чемпионимизнинг ушбу вазиятда қандай ишлар билан машғул эканлиги ва ёш спортчиларимизга берган ўзига хос тавсиялари ҳақида ҳикоя қиламиз. Бу сафарги “қаҳрамон”имиз самбо устаси Нилуфар Раҳмонова бўлади. Шу ўринда ушбу яккакурашчи вакиламиз ҳақида тўхталиб ўтишни лозим топдик:

  Нилуфар 1997 йил 15 январда Бухоро шаҳрида таваллуд топади. У 7 ёшидан бошлаб, самбо билан мунтазам шуғулланишни бошлаган. 11 ёшидаёқ ўсмирлар ўртасида мамлакат чемпионлигини қўлга киритади. 15 ёшида ёшлар ўртасида Осиё чемпионати ғолибасига айланган.Ўз устида ишлашни давом эттирган Раҳмонова 2006 йилдан 2018 йилга қадар кетма-кет Ўзбекистон чемпиони, 2012 дан 2017 йилга қадар Осиё чемпиони, 2013-2017 йиллар мобайнида бир неча бор жаҳон чемпионати совриндори, 2018 йил “Париж” Гран-Присида совриндор, 2018 йил Америка очиқ чемпионати ғолибаси, 2018 йил Лас-Вегасда ўтказилган “Жаноб Олимпия” турнири чемпиони, 2019 йил Калифорния штатида бўлиб ўтган АҚШ очиқ чемпионати ғолибаси,  2019 йил “А” тоифадаги халқаро турнир чемпионига айлана олган. Бир сўз билан айтганда ўзбек самбо оламида энг совриндор вакилаларимиздан биридир.

  Албатта, ҳозирги кунда коронавирус пандемияси туфайли юртимизда ҳам карантин ҳолати жорий этилган. Шу туфайли, барча спортчиларимиз уй шароитида машғулотларни давом эттирмоқда. Жумладан, Нилуфар Раҳмонова ҳам асло, ҳотиржамликка берилаётгани йўқ. У ҳам мураббийларининг онлайн кўрсатмалари орқали машғулотлар жараёнини давом эттирмоқда.

 Нилуфар айни кунда ҳам жисмоний ҳолати ажойиб кўриниш олганлиги, бу формани тушириб юбормаслик учун тинмай меҳнат қилаётганлиги ва ушбу пандемия бартараф этилиб, катта мусобақалар яна старт олса, жаҳон ареналарида бунданда юксак марраларни забт этишни ўз олдига мақсад қилиб қўйганлигини таъкидлаб ўтди.

 Шунингдек, ёш спортчиларимизга вақтини унумли ўтказиш учун машғулотларга зўр бериш кераклигини, ўзига хос мотивация берадиган спортга оид фильмлар томоша қилишни, чемпионларга бағишланган умуман олганда ибратли китоблар ўқишни тавсия қилди. Қолаверса, карантин қоидаларига амал қилган ҳолда ота-онаси бағридан узоқлашмай, уйда қолишни маслаҳат берди. 

 Шу ўринда биз ҳам сайтимиз ижодкорлари номидан ушбу спортчимизнинг келгуси фаолиятида омадлар ёр бўлишини тилаб қоламиз!