Қатарда жаҳон чемпионати давом этмоқда. SPORTS.uz сайти ижодкорлари ушбу мундиал кундалигини тақдим этади.

Ўртоқлик ўйинида Ўзбекистонга енгилган Камерун жаҳон чемпионатини мағлубият билан бошлади. Африканинг бу жамоаси ҳам 1-турда гол ура олмади.

Суарес бошчилигидаги Уругвай Жанубий Корея дарвозасига йўл топа олмади. Учрашувда хавфли вазиятлар деярли содир этилмади. Шунинг учун дарвозалар дахлсизлиги сақланиб қолинди.

Португалия ниҳоят жаҳон чемпионатини ғалаба билан бошлади. Аммо бу осон бўлмади. Охирги дақиқаларда португаллар ғалабани дурангга алмашиши мумкин эди. Бахтга қарши ганалик футболчи дарвозага зарба бера олмади.

Бразилия юлдузларга шу қадар бойки, рақиблар қайси футболчидан хавф кутишни билмайди. Лекин бу тур Ришарлисонга аталди. У жамоасининг ғалабасини таъминлаш билан бирга, турнинг энг чиройли голига ҳам муаллифлик қилди.

Қуйида мана шу ўйинлар ҳақида фикр юритамиз.

Швейцария - Камерун 1:0

Жаҳон чемпионатининг навбатдаги баҳси Швейцария ҳамда Камерун терма жамоалари ўртасида бўлиб ўтди. Европа ва Африка термаларининг ўзаро тўқнашувида "кўҳна қитъа" вакиллари кичик ҳисобдаги ғалабани қўлга киритди - 1:0.

48-дақиқада Шакирининг қанотдан ошириб берган ажойиб узатмасидан сўнг Эмболо тўпни рақиб дарвозасига жойлаб қўйди. Бу гол ўйинда ягоналигича сақланиб қолинди ва Мурат Якин шогирдлари илк турда муҳим 3 очкога эга чиқди.

Беллашув давомида Швейцария ва Камерун жамоалари умумий ҳисобда 15 та зарба берди. Улардан 8 таси дарвоза томон аниқ борди. 3 таси европаликлар ва 5 таси африкаликлар фойдасига.

Муҳим фактлардан бири сифатида Швейцариянинг сўнгги 6 мундиалдаги илк тур ўйинларида мағлубиятга учрамай келаётганини айтиб кетишимиз мумкин. Охирги марта улар 1966 йилда Германияга 1-тур доирасида мағлуб бўлганди. Шундан сўнг 3 ғалаба ва 3 дуранг қайд этилган.

Камерун Жаҳон чемпионатларидаги охирги 8 учрашувнинг барчасида мағлубиятга учради. Бу борада антирекорд Мексикага тегишли. Шимолий америкаликлар 1930-1958 йиллар давомида ўтказилган дунё биринчилигида 9 ўйинлик мағлубиятли серия қайд этган.

Қолаверса, Ганадан ташқари Африканинг қолган барча жамоалари 1-турда гол ура олмади. Ганаликлар илк баҳсда Португалия билан мардонавор курашиб, якунда 2:3 ҳисобида енгилди.

Шу тариқа, Европанинг гўзал ландшафтига эга термаси мундиал гуруҳ босқичини муваффақият билан бошлади. Ўзбекистонга енгилган Камерун эса дастлабки турда кичик ҳисобда мағлубиятга учради.

 

Уругвай - Жанубий Корея 0:0

Қатар мамлакатида ўтаётган Жаҳон чемпионати 1-туридан ўрин олган баҳслар давом эттирилди. Улардан бирида Уругвай Жанубий Корея билан куч синашди. Ушбу беллашувда жамоалар нурсиз дурангга имзо чекди.

Беллашув давомида жамоалар умумий ҳисобда 17 та зарба берди. Улардан атиги биттаси дарвоза томон аниқ борди. Баҳсдаги ягона аниқ уриниш Жанубий америкаликлар томонидан содир этилди.

Қизиғи, Уругвай гуруҳ босқич ўйинларида 465 дақиқадан бери гол ўтказмай келмоқда. Сўнгги бор терма 2014 йилда Англиядан гол қабул қилиб олганди. Ўшанда Уэйн Руни Жанубий Америка вакилларини ранжитганди.

Шунингдек, 36 ёш-у 281 кунлигида Диего Годин Уругвай таркибида ҳаракат қилган жамоа тарихидаги энг ёши катта футболчиси бўлди.

Илк турда икки жамоа ҳам гол уриш учун яхшигина тер тўкди. Аммо баҳс нурсиз дуранг билан якун топди. Жамоалар илк турда 1 очкога эга чиқди.

 

Португалия - Гана 3:2

1-турдан ўрин олган Португалия ва Гана терма жамоалари ўртасидаги ўйиннинг биринчи бўлими сокин ўтган бўлса, иккинчи 45 дақиқаликда майдон чинакамига “ёнди”. Охирги дақиқаларгача кураш кечди. Чунки беллашувда интрига сақланиб қолганди.

64-дақиқада Криштиану Роналду жарима майдони ичида йиқитилди ва жабрланувчининг ўзи пенальтини аниқ амалга ошириб, ҳисобни очди. Орадан кўп вақт ўтмай, Андре Айю мувозанатни тиклади. Кейин тезкорлик билан португаллар иккита гол билан жавоб берди. Дастлаб Фелиш шериги етказиб берган тўпни совуққонлик билан дарвозага йўллади. Ушбу ўтказиб юборилган голдан ҳали ўзига келмаган Гана яна бир голни қабул қилиб олди. Бу гал Леау ўз номини таблога ёздириб қўйди.

Уйиннинг сўнгги дақиқаларида Букари ўзининг голи билан ҳисобни қисқартирди. Букари голни Роналду услубида нишонлади ва бу Криштиануга ёқмади. 

Ҳакам томонидан қўшиб берилган дақиқада португалияликлар посбони мухлислар ва жамоадошларининг юрагини туширди, десак муболаға бўлмайди. Вазиятни ўзингиз томоша қилинг.

Португалия терма жамоаси 16 йилдан буён илк маротаба жаҳон чемпионатини ғалаба билан бошлади. Сўнгги бора португаллар 2006 йилги мундиалнинг 1-турида Анголани 1:0 ҳисобида таслим этганди. Ўшанда улар ярим финалга қадар етиб бориб, финал арафасида Францияга имкониятни бой берганди.

"Opta" статистик нашри маълумотларига кўра, Жоау Фелиш Португалия таркибида жаҳон чемпионати доирасидаги беллашувларда гол урган учинчи энг ёш футболчига айланди. Фелиш 23 ёш-у 13 кунлигида муваффақиятга эришди.

1966 йилги жаҳон чемпионатида Португалия терма жамоаси сафида гол урган Антонио Симоэш 22 ёш-у 217 кунлик ва 2006 йилги мундиалда тўп киритган Криштиану Роналду 21 ёш-у 132 кунлик бўлганди.

photo_2022-11-25_14-18-43

Қайд этиш лозим, жамоа сардори Криштиану Роналду мазкур беллашувнинг энг яхши футболчиси, дея эътироф этилди. "Sofascore" нашри талқинига кўра эса энг юқори баллга Бруно Фернандеш (6.3) лойиқ деб топилди.

Роналду 5 та мундиалда гол урган тарихдаги биринчи футболчига айланиб, рекорд ўрнатди. Шунингдек, Роналду еттинчи марта ўйиннинг энг яхшиси бўлди, бу ҳам рекорд. Бу мукофот жаҳон чемпионатларида 2002 йилдан таъсис этилган. Лионель Месси ва Арьен Роббен Криштианудан биттага ортда қолмоқда.

 

Бразилия - Сербия 2:0

1-тур доирасидаги сўнгги баҳсда Бразилия Сербияга қарши майдонга тушди. Қизиқарли ва турнинг, эҳтимол мусобақанинг энг чиройли голи киритилган ўйинда "пентакампеонлар" ишончли ҳисобда ғалаба қозонди - 2:0.

Дастлабки дақиқалар кескин ҳужумлар остида бошланди. Ҳар икки жамоа ҳам тўпни кўпроқ назорат қилишга уруниб, рақиб дарвозаси олдидан бир қанча хавфли вазиятлар ҳосил қилди. Бироқ илк бўлимда мухлислар гол кўришмади.

Иккинчи тайм жанубий америкаликлар устунлиги остида бошланди. Винисиус чап қанотдан дарвоза томон зарба йўллади, бироқ серблар посбони тўпни қайтариб юборди. Қайтган тўп Ришарлисонга келиб тушди. "Тоттенхэм" ҳужумчиси эса тўпни дарвозага киритди.

73-дақиқада Ришарлисон яна катта саҳнага чиқди. У Винисиуснинг ажойиб узатмасидан кейин тўпни ўзига тўғрилаб олди ва чалқанча усулда супер гол урди.

80-дақиқада Неймар ўз ўрнини Антонига бўшатиб берди. Чунки Неймарга нисбатан сербиялик футболчилар 9 маротаба қўполлик ишлатганди. Шу боис ПСЖ юлдузи жароҳат олгани учун алмаштирилди.

Қолган дақиқаларда икки жамоа ҳам бошқа гол ура олмади. Бразилия биринчи турдан кейин 3 очко тўплаган ҳолда ўз гуруҳида етакчига айланиб олди.

Шу тариқа, Бразилия кетма-кет 8-ўйинда зафар қучди, мағлубиятсиз серия эса 16 учрашув етди. 2021 йилнинг июль ойида Аргентинага қарши ўтказилган Америка кубоги финалидан сўнг бразилияликлар 13 та ғалаба, 3 та дурангга эришди. Тўплар фарқидаги кўрсатгич ҳам аъло даражада: 28-2.

Ушбу линк орқали Жаҳон Чемпионати кундалиги 4-сонининг видео вариантини томоша қилинг 

Фикрлар

Фикр қолдириш учун авторизациядан ўтинг!