Суперлиганинг бу мавсуми якунланишига 2 та тур қолди. Айни пайтга келиб чемпион, вице-чемпион номи аниқ. Энди 3-ўрин соҳиби ёки ОЧЛ саралаши йўлланмаси кимга насиб этишини билиш қолди холос.

Қолаверса, чемпионатни нечта жамоа тарк этади? деган савол кўпчиликни қизиқтирмоқда. Ушбу саволга ПФЛ вакили Диёр Имомхўжаев телеграмдаги ўзининг саҳифасида жавоб ёзди.

- Шу савол кўпчиликни адаштиряпти. Ёдингизда бўлса, йил аввалида формат 12 та клуб учун мосланганди. Ва бунда 2 та клуб қуйи лигага тушиб кетиши, яна бири эса ўтиш ўйинида иштирок этиши керак эди.

Бироқ қуръа маросимига бир неча соат қолганида жамоалар сони 14 тага етди. Шундан келиб чиқиб, лигадан фақатгина 1 та клуб тушиб кетадиган бўлди (яъни, сўнгги жамоа). Унинг ўрнини эса "Машъал" эгаллаши аниқ бўлиб улгурган.

Нима учун фақатгина битта? Боиси, 12 талик форматда Про-лигада даъвогарлар сони кўпроқ эди. "Сурхон" ва "Динамо"га чипта насиб қилгач, Суперлигада реал тўп сура оладиган жамоалар сони Про-лигада камайиб кетди. Айни ҳолатда Суперлига талаблари учун "Машъал" ва "Шўртан" клубларигина жавоб бера олишарди. Қолган жамоаларда лицензиялаш талаблари билан боғлиқ муаммолар бор. Ўз-ўзидан, даъвогарлар сонидан йўлланмалар сони камроқ бўлиши керак, бошқачасига рақобат қилиб бўлмасди, - дея ёзди Диёр Имомхўжаев.