Хамеснинг келажаги қаерда давом этиши мумкин?

Хабарларга кўра, мюнхенликлар раҳбарияти келаси йил ёзида «Реал»дан ижара асосида келиб қўшилган 27 ёшли колумбиялик плеймейкер трансферини тўлиқ тартибда расмийлаштирмоқчи эмас.

У Германияда дастлаб «қаймоқранглилар»да бирга ишлаган мураббийи Карло Анчелотти қўли остида илиқ таассуротлар қолдирганди. Аммо унинг спорт формасидаги пасайиш билан унинг клубдаги мажбуриятлари ва ўрни ҳам пасайиб борди.

Юпп Хайнкес қўли остида эса бироз жонлангандек кўриниш берганди. Аммо янги мавсум у учун «Бавария» либосида сўнггиси бўлса ажабмас.

Нико Ковач билан мавсум стартини ёмон бошлаган мюнзенликлар Бундеслиганинг 11-туридан кейиноқ «Боруссия Дортмунд»дан 7 очкога ортда қолиб кетмоқда. Мавсум шу тариқа якун топса келаси йил ёзда клубда катта ўзгаришлар қилиниши шубҳасиз. Бу дегани жамоа бир қатор футболчилари билан хайрлашиши турган гап. Катта байрамларда ўйинга туширилаётган Хамес ҳам ўзига янги жамоа топиши мумкин. Аммо унинг кейинги фаолияти қайси клубда давом этади? Бу савол унинг кўплаб мухлисларини қизиқтириши бор гап. 2014-йилги Мундиал тўпурарининг кўплаб мухлислари юртимизда ҳам топилади.

Орзу: «Реал Мадрид»

«Реал» ва Хамес Родригес ҳамкорлиги қисқа муддат давом этган бўлсада, колумбиялик футболчи «қироллик клуби»да ўзининг яхши футболини намойиш қилган. Мадридликлар учун 111 ўйинда у 36 гол ва 38 голли узатмани амалга оширган.

«Реал» Ла Лигада ҳозир эгаллаб турган ўрнидан қатъий назар элита клуб ҳисобланади. Кўпчилик учун эса клуб ҳамон юқори чўққи ҳисобланади. Агарда кимдир у ерда ўзини кўрсата олган бўлса тарихнинг олтин зарварақларига кириши 100 % кафолатланган.

«Сантьяго Бернабеу»да ишлар юришмаётганини эътиборга олсак, Хамес «қаймоқранглилар» эҳтиёэж сезаётган футболчи бўлиши мумкин. Боз устига, у «Реал»га бир тийинга ҳам тушмайди. Ярим ҳимоячи эса Флорентино Перес истаётган кўпроқ ишни бажара олишга қодир.

Энг муҳими унинг клубдан кетишига хайриҳоҳ бўлган Зинедин Зидан ортиқ клуб бошқарувида эмас. Клуб айни вақтда Сантьяго Солари мураббийлигида ўзига кела бошлади.

Ҳақиқат: «Ювентус»

Аргентина, Португалия, Испания ва Германияда чемпион бўлган Хамес бешинчи мамлакатда ҳам чемпион бўлса ёмонми? Европанинг «кучли бешлиги»нинг учтасида ўйнашга улгурган футболчи ўз таржимайи-ҳолини бойитиб боришни давом эттириши мумкин.

А Серияда кўпроқ техника талаб қилинганлиги боис у ерда ярим ҳимоячиларга «қирол»дек муомала қилишади. Унинг «Бавария»га ўтишидан олдин айнан «кекса синьора» қизиқиш билдиргани эътиборга молик.

«Юве» ҳозир суперклуб мақомида эмас. Аммо эртага нима бўлиши номаълум. Хабарларга кўра, Хамес ҳамон уларнинг трансфер мақсади бўлиб турибди. Барчаси футболчига боғлиқ.

Қўшимчасига унинг «Реал»даги ҳамкори Криштиану Роналду Туринда жавлон урмоқда. Иккаласи биргаликда 86 марта ҳавфли вазиятлар яратишган. 18 голга ҳаммуаллифлик қилишган. Хуллас ўзаро ҳамкорлик даражаси анча илиқ таассурот қолдирган.

Джокер: «Ливерпуль»

Дунёнинг энг кучли лигасини ҳар ким турлича шарҳласада, Премьер Лига томошабоплиги ва энг қимматлиги билан бошқалардан ажралиб туради. Клубларнинг молиявий имкониятлари баландлиги, ТВ трансляциясидан тушадиган даромад туфайли Хамесни ўзига қўшиб оладиган кўплаб инглиз жамоалари бор.

Олти жамоа «кучли тўртлик» ўринлари учун кураш олиб борадиган Англия ярим ҳимоячининг кейинги бекати бўлиши мумкин. Унга мос клуб эса Юрген Клоппнинг қайноқ «Ливерпули» тўғри келади.

Сўнгги икки йил ичида унинг жамоаси анча кучайди ва чемпионлик учун асосий рақобатчига айланишга улгурди. Шу йил бошида Филиппе Коутиньонинг йўқотилиши эса уларга кучли ярим ҳимоячи кераклигини англатади.

Хамес ўйинни ўзгартира олиши ва тез ҳаракатланиши туфайли Клоппнинг «эркатойи»га айланиб олиши мумкин.