Алонсо Мбаппе ва Винисиус қандай ҳаракат қилиши кераклигига яна бир бор ойдинлик киритди

Мадриднинг "Реал" клуби бош мураббийи Хаби Алонсо Килиан Мбаппе ва Винисиус Жуниор ҳақидаги навбатдаги саволларга жавоб берди. Маълумки, ушбу икки юлдуз футболчи Карло Анчелотти даврида тўпсиз ҳолатларда етарлича фаол ҳаракат қилмагани учун жамоа мудофааси муаммоларга дуч келган.

Пресс-конференцияда бу ҳақда сўралган Хаби Алонсо қуйидагича жавоб берди:

"Мбаппе ва Винисиус? Биз барча футболчилар биргаликда ишлайдиган жамоавий ғояга амал қилмоқчимиз. Тўпсиз қандай ҳаракат қилиш кераклигини биламиз ва футболчиларимизнинг индивидуал хусусиятларини қаерда ва қандай қўллашни ҳам биламиз. Ҳужумчилар эса фарқ яратиши шарт" — дея ўз фикрлари билан ўртоқлашди испаниялик мутахассис.

Эслатиб ўтамиз, 1 июль куни "қироллик клуби" Клублар ўртасидаги Жаҳон чемпионати 1/8 финалида "Ювентус"га қарши майдонга тушади.