Анчелотти дербида ишончини оқлаган уч футболчи номини айтди

Испания чемпионатининг 23-турида мусобақа жадвалида дастлаки икки поғонани эгаллаб турган “Реал” ва “Атлетико” ўзаро тўқнаш келди.

Мадрид дербисида кучлар тенг келди. Диего Симеоне шогирдлари 35-дақиқада пенальтидан ҳисобни очган бўлса, 50-дақиқада Килиан Мбаппе мезбонларни мағлубиятдан қутқариб қолди - 1:1.

Ушу беллашувдан кейин Карло Анчелотти ўзида яхши таассурот қолдирган уч нафар шогирди номини айтди.

- Дани Себальос ҳар доимгидек ўзини юқори даражада кўрсата олди. Ҳимоя марказидан жой олган Орельен Тчуамени ҳамда Рауль Асенсио ҳам жуда яхши ўйин кўрсатиб, менда яхши таассурот қолдирди.

Энди биз келаси ҳафта сешанба куни бўладиган муҳим учрашувга жамоани қандай қилиб тиклаш ҳақида бош қотиришимиз керак, - деди Карло Анчелотти.

Айни пайтда Испания чемпионатида 50 очко билан “Реал” пешқадам бўлиб турибди. “Атлетико” ҳисобида 49 балл бор. Уларни таъқиб қилаётган “Барселона” ҳозирча бир ўйин кам ўтказган ҳолда “Атлетико”дан тўрт очкога ортда қоляпти.