Анчелотти: "Мадриддаги ҳеч бир нарсани унута олмайман"

Карло Анчелотти “Реал Сосьедад”га қарши ўйиндан сўнг (2:0) “Сантьяго Бернабеу” стадионида сўзга чиқди. Бу италиялик мутахассис учун “Реал” бош мураббийи сифатидаги сўнгги ўйин эди.

"Бу клуб ва жамоани бошқариш мен учун шараф ва завқ бўлди. Аввало, азиз президентимиз Флорентино Пересга ўз миннатдорчилигимни билдирмоқчиман. Бундай юқори даражадаги футболчилар билан ишлаш — бу катта бахт.

Сизлар билан бирга, бу тарихни яшаш — ажойиб тажриба бўлди. Бу оддий эмас, ўзига хос тарих эди. Чунки ҳеч ким Каримнинг ПСЖ дарвозасига урган уч голини, Родригонинг "Сити"га урган икки голини, Лука Модричнинг "Челси"га қарши ўйиндаги пасини ёки Хоселунинг икки голини унута олмайди.

Бу ерда ўтказган кунларимни ҳеч қачон унута олмайман. Шу сўзлар билан якунлайман: “Яша, Мадрид — ва бошқа ҳеч нарса!”. Мен сизни жуда яхши кўраман" — дея Мадрид мухлислари билан хайрлашди италиялик мутахассис.

Эслатиб ўтамиз, 26 майдан бошлаб у Бразилия терма жамоасининг бош мураббийи сифатида иш бошлайди.