“Барса” мадридликлар суперҳужумчисидан юз ўгирди

Испаниянинг амалдаги чемпиони “Барселона” клуби Мадриднинг “Атлетико” жамоаси форварди Хулиан Альварес клубга керак эмас, деган қарорга келди ва уни сотиб олиш ғоясидан воз кечди.

Бу ҳақда Sport.es хабар берди.

Манбаниинг маълум қилишича, биринчидан, каталонияликлар футболчининг нархи жуда юқори, деб ҳисоблайди. Таъкидланишича, Альвареснинг шартномасида 500 миллион евро миқдоридаги тўлов (клаусула) кўрсатилган, шу билан бирга мадридликлар уни 200 миллион евродан камига сотмаслигини маълум қилган.

Иккинчидан, аргентиналик юлдуз икки жамоанинг ўзаро тўқнашувида “Барселона”га бор маҳоратини намойиш қила олмаган.

Жорий мавсумда Альварес барча мусобақаларда 19 та ўйинда майдонга тушди ва 10 та гол ҳамда 4 та голли узатма қайд этди. Футболчининг амалдаги шартномаси 2030 йил ёзигача амал қилади. Transfermarkt портали маълумотларига кўра, унинг бозор қиймати 100 миллион еврога тенг.