"Челси" янги вингер трансфери бўйича ҳали ҳамон келиша олмади

Лондоннинг “Челси” клуби ҳали ҳам “Боруссия Дортмунд” билан қанот ҳужумчиси Жейми Гиттенснинг трансфери бўйича товон пули масаласида келишувга ериша олмаяпти.

Журналист Флориан Плеттенбергнинг хабар беришича, "арилар" инглиз футболчиси учун 60 миллион евро талаб қилмоқда. Эслатиб ўтамиз, "Челси"нинг охирги таклифи 35 миллион евро эди. Энцо Мареска бошчилигидаги жамоа Дортмунд клуби талабларини қондиришга рози бўлиши ёки бўлмаслиги ҳозирча номаълум. Гиттенс илгари "аристократлар"нинг яна бир янги трансфери Лиам Делап сингари "Манчестер Сити" академиясида таълим олган. 
 
Маълумот ўрнида, 20 ёшли футболчи якунланган мавсумда 48 та учрашувда иштирок этиб, 12 та гол ва 5 та голли узатмани амалга оширган. Унинг Transfermarkt порталидаги нархи 50 миллион евро деб баҳоланмоқда.