Доннарумма ПСЖда қолиши мумкин

"L’Equipe" нашрининг маълумотига кўра, Жанлуижи Доннарумма ПСЖда камида яна январгача қолиши мумкин. Аммо италиялик дарвозабон имконияти бўлса, жамоани тарк этишни афзал кўради.

Манбаларга кўра, яқинда "Манчестер Сити" футболчи учун 15 миллион евро таклиф қилган, аммо бу сумма парижликлар учун етарли эмас. ПСЖ ҳеч қандай "беҳуда арзон" келишувга рози бўлмаслиги таъкидланмоқда.

"25 миллион, балки 30 миллион евро – бу ҳам катта имтиёз ҳисобланади", – деб ёзади манба.

Шу билан бирга, "шахарликлар" шошилмаяпти. Улар музокараларни қишгача қолдириши ва ўшанда яна ҳам пастроқ таклиф бериши мумкин. Шунингдек, "Сити" 2026 йил ёзида, шартномаси тугагач, Доннаруммани эркин агент сифатида ҳам қўлга киритиш имкониятига эга.