Фабио Каннаваро: “Уругвайга қарши ўйнаш осон эмас эди, лекин жамоамдан фахрланаман”

Ўзбекистон терма жамоаси бош мураббийи Фабио Каннаваро Уругвайга қарши ўтказилган ўртоқлик учрашувидан сўнг ўз фикрларини билдирди.

“Терма жамоада ҳар доим вақтимиз чекланган. Афсуски, бу сафар 9 нафар футболчимиз жароҳат сабаб ўйинда иштирок эта олмади. Мен учун барча футболчиларнинг имконият ва салоҳиятини кўриш жуда муҳим эди. Улар билан кўпроқ вақт ўтказиб, кўплаб жиҳатларни яхшилаш устида ишлашни хоҳлайман. Футболчиларнинг кайфияти ва майдонда бор кучини бериб ўйнаганидан жуда мамнунман.”

“Уругвайга қарши ўйнаш осон эмас эди. Малайзияга икки кун олдин учиб келганимиз боис, яхши дам олиш имкони бўлмади. Шунга қарамай, шогирдларим яхши ўйин намойиш этди. Кучли жамоаларга қарши гол уриш муҳим. Бизда 2–3 та яхши имконият бўлди, бироқ улардан фойдалана олмадик. Шунга қарамай, футболчиларга раҳмат айтаман — тўпсиз ўйинда юқори темпда ҳаракат қилишди. Тўп бизда бўлган пайтларда эса чиройли ҳужумлар уюштиришга ҳаракат қилдик. Уругвайни қийин аҳволга солиш осон эмас — уларнинг футболчилари ақлли ва кучли лигаларда тўп суради. Лекин жамоам кўрсатган ўйиндан мамнунман, чунки бу жамоада катта салоҳият бор.”

“Биелсадан ижобий фикрлар эшитганимдан хурсандман. У футболни ўзгартирган, тажрибали мураббий. Мен ундан кўп нарсаларни ўрганаман.”

“Бизда ҳали 8 ой вақт бор. Бу даврда жисмоний жиҳатдан яхшиланишимиз зарур. Аммо бу фақат машғулотларга боғлиқ эмас. Футболчиларнинг овқатланиши, дам олиши, ухлаши ва машғулот сифати ҳам катта аҳамиятга эга. Энди футболчилар ‘Жаҳон чемпионатига бораман’ деган фикр билан яшамаслиги керак — биз мусобақага босқичма-босқич тайёрланишимиз лозим. Мундиал осон бўлмайди.”

“Ноябрь ойида иккита ўйин ўтказишни режалаштирганмиз. ФИФА кунлари тугагач, мен Ўзбекистонда қоламан. Суперлига учрашувларини кузатаман, клуб мураббийлари билан танишаман, машғулотларга бориб футболчиларни томоша қиламан. Бу терма жамоа мураббийининг иши. Шунингдек, дунё бўйлаб ўйнаётган ўзбек футболчиларини ҳам кузатиш учун вақт топаман.”

“Кейинги икки баҳс Дубайда бўлиб ўтади. Фақат йиғинга чақирилган футболчилар эмас, балки чемпионатда яхши ҳаракат қилаётган ўйинчиларни ҳам кузатиш керак. Иложи бўлса, уларни ҳам чақириб, синаб кўриш ниятимдаман.”

“Уругвай киритган биринчи гол офсайд ҳолатидан киритилган деб ўйлайман. Иккинчи голда эса биз рақибга жуда кўп бўш ҳудуд тақдим этдик. Ба’зан жарима майдонида зичроқ ўйнаш керак. Кучли жамоаларга қарши баҳсларда хатоларни камайтириш, эътибор ва диққатни тўлиқ жамлаш зарур.”

“Футболчиларга таннаффусда биринчи 15 дақиқада эҳтиёт бўлиш кераклигини айтган эдим. Биринчи бўлимда яхши ўйнадик, лекин агар эътиборни йўқотсак, бу рақиб учун имконият бўлади. Уругвай айнан шундан фойдаланди.”

“Ўйинчилар яхши кайфиятда майдонга тушишди. Улар билан ўйиндан сўнг суҳбатлашдим — уларга темпни ошириш зарурлигини айтдим. Баъзилар иккинчи таймда бироз чарчагандек кўринди, лекин мотивацияни юқори сақлаш керак. Ўйин динамикасини ўзгартириш ҳақида гапирдим ва баҳс якунида буни амалга оширишга ҳаракат қилдик. Битта гол урдик, яна уриш учун имконият яратдик. Кийим алмаштириш хонасида футболчилардан фахрланишимни айтдим. Бу ерга келганимдан бери ҳар бир футболчи бор кучини бериб ўйнамоқда.”