Фермин Лопес "Барселона" мухлисларига хушхабар айтди

"Барселона" ярим ҳимоячиси Фермин Лопес Каталония клубини тарк этиши ҳақидаги миш-мишларни рад этди. Аввалроқ, футболчига "Манчестер Юнайтед", "Бавария" ва "Челси" клублари қизиқиш билдираётгани ҳақида хабарлар тарқалган эди.

"Барселона" мухлислари нафас ростлашлари мумкин, чунки мен шу ерда қоламан. Мен "Барселона"ни тарк этмайман", - дея Лопеснинг сўзларини келтирди журналист Фабрицио Романо Х ижтимоий тармоғидаги саҳифасида.

Ўтган мавсумда "кўк-анорранглилар"нинг 22 ёшли тарбияланувчиси барча мусобақаларда 46 та ўйинда иштирок этиб, 8 та гол ва 10 та ассистни ўз ҳисобига ёздириб қўйди. Трансфермаркт порталида келтирилган маълумотларга кўра, футболчининг бозор нархи 50 миллион еврони ташкил этади.