Флик "Реал" билан Чемпионлар Лигаси финалида ўйнаш истаги бор-йўқлигига жавоб берди

"Реал" ва "Барселона" Чемпионлар Лигаси турнирининг қарама-қарши томонларига тушишди. Бу шуни англатадики, Испания футболининг икки гранди фақат финалда ўзаро тўқнаш келиши мумкин. Каталонияликлар бош мураббийи Ханс-Дитер Флик матбуот анжуманида "Реал"га қарши финалда ўйнашни хоҳлайсизми?" деган саволга жавоб берди.

"Аввало, финалга етиб боришимиз керак. Бу бизнинг мақсадимиз. У ерга етиб бориш учун эса узоқ йўлни босиб ўтиш лозим. Дастлаб жуда кучли жамоа бўлган "Бенфика"ни мусобақадан чиқариб ташлашимиз керак", – деди Флик журналистларга.

"Барселона" ўзининг навбатдаги учрашувини 22-февраль куни Ла Лига доирасида "Лас-Палмас"га қарши ўтказади.