Грилиш: "Сўнги йилларда футбол ўйнаб завқ олмадим"

Ижара асосида "Манчестер Сити"дан "Эвертон"га ўтган Жек Грилиш сўнгги бир неча йил ичида футболдан кўп завқ олмаганини айтди. АПЛ 2-туридан ўрин олган "Брайтон"га қарши баҳсда англиялик вингер иккита ассистни амалга оширди.

"Ўйлашимча, сўнгги бир неча йил ичида баъзида футболга бўлган муҳаббатимни йўқотгандек бўлдим - йўқ, бутунлай йўқотмадим, лекин ундан кераклича завқ олмадим. Оила аъзоларим баъзан уйда бўлганимда менга бу ҳақда гапиришарди. Бу бошқа биров туфайли эмас, фақат ўзим туфайли.

Аммо, мен футболни чиндан ҳам яхши кўраман ва ўйин куни уйғониб, майдонга тушишни сабрсизлик билан кутаётган пайтингдаги ҳиссиётни яна бошдан кечиришни истайман. Бугун мен буни ҳис қилдим ва умид қиламанки, менинг ўйиним буни кўрсатди", - дея Грилишнинг сўзларини келтирди Манчестер Evening News.

"Эвертон" Грилишнинг "Манчестер Сити"дан ижара асосида кўчиб ўтганини 12 август куни эълон қилди. 29 ёшли футболчи 2025/2026 йилги мавсумни "ирислар" сафида ўтказади. Эслатиб ўтамиз, Жек 2021 йилда "шаҳарликлар" сафига "Астон Вилла"дан келиб қўшилганди.