Гвардиола Холанддан ҳафсаласи пир бўлганини айтди

“Манчестер Сити” футболчилари Англия Премьер-Лигасининг саккизинчи турида Эрлинг Холанднинг дубли эвазига “Эвертон”ни 2:0 ҳисобида мағлубиятга учратди ва чемпионлик курашига қайтди.

Ўйиндан кейин “шаҳарликлар” бош мураббийи Хосеп Гвардиола жамоаси ютганига қарамай, эътирозлари кўплигини яширгани йўқ.

- Холанд бу ўйинда иккита эмас, тўртта ёки бешта гол уриши керак эди ва бундан ҳафсалам пир бўлди. Лекин биз фақат Эрлингнинг голларига суяниб қолмаслигимиз кераклигини яхшилаб англаб олишимиз шарт.

Холанд ҳар доим ўз жойида, аммо бошқалар ҳам гол уриши лозим. Агар вингерлар ва ҳужумкор ярим ҳимоячилар тўп киритмаса, кўзлаган мақсадларимизга эриша олмаймиз.

Эрлинг биз учун ўта муҳим фигура, бироқ бошқаларнинг ҳам таланти уникидан кам эмас. Ҳар бир футболчи яратилаётган вазиятлардан унумли фойдаланиши керак, - деди Хосеп Гвардиола.

 25 ёшли Холанд саккизта учрашувда 11 та тўп киритиб, Премьер-лига тўпурарлари пойгасида пешқадамлик қилмоқда. Холанд саккизта ўйиннинг тенг ярмида рақиблар дарвозасига иккитадан тўп киритган.