Ҳакамнинг таъзирини бермоқчи бўлган “Реал” юлдузи узоқ муддатга четлатилиши кутиляпти

“Реал” ва “Барселона” иштирокидаги Испания кубоги финали голлар билан бирга турли можароларга ҳам бой бўлди.

Айниқса, каталонияликлар ғалаба тўпини киритганидан кейин “Реал” ўйинчилари анча кескин ҳаракат қилди. Вазиятларнинг бирида учрашув ҳаками Килиан Мбаппе рақиб футболчиси Эрик Гарсияга қўполлик ишлатгани учун баҳсни тўхтатди.

Бу ҳолат Антонио Рюдигерга ёқмади. Захирага олинганига бир неча дақиқа бўлган германиялик ҳимоячи бош ҳакам Рикардо де Бургос Бенгоэчеанинг таъзирини бермоқчи бўлди. Бироқ Рюдигернинг жамоадошлари уни тўхтатиб қолди ва майдонга чиқишига тўсқинлик қилди.

Рюдигер ўзини йўқотиб қўйди ва ҳакамга муз тўлдирилган пакетни отди. Гарчи уни ичкарига олиб кириб кетишган бўлса-да, яна қайтиб келиб, бош ҳакамга таҳдид қилди.

Экспертларнинг таъкидлашича, майдонда ташқаридаги ҳаракатлари учун қизил карточка олган Антонио Рюдигер тажаввузкорлиги сабабли узоқ муддатга дисквалификация қилиниши кутиляпти.