Ҳаммасига Флик айбдорми?

”Семнадцатый номер” телеграм канали ёзяпти:

“Барселона” “Эльче”га қарши ўйинда тўпни назорат қилишга уринмади, ташаббусни рақибга топширди, аммо ўрта блокда зич жойлашиб олган ҳолда, босим қилиб, барибир устунлик қилди. “Брюгге”га қарши эса 76% тўп назорати бўлди — лекин ҳеч қандай устунлик йўқ.

Ўйинчилар орасидаги масофалар жуда катта, зоналар шамол ўтадиган даражада бўш. Ҳар қандай тўп йўқотилиши — “Брюгге”нинг қарши ҳужумига айланади. Буни асосий футболчиларнинг жароҳатлари, умумий чарчоқ ёки кам захира ресурслари билан изоҳлаш мумкин. Бироқ “Барселона” бир хил хатоларни такрорлаяпти. Муаммоларнинг табиати шунчалик равшан-ки, уларни тузатмаслик – жиноятга тенг.

Фликнинг “торнадо-футболи” энг кучли ўйинчилар сафда бўлганда ва улар тетик бўлганда ўта хавфли. Аммо таркиб заифроқ бўлса ёки жисмоний тайёргарлик паст бўлса, бу “торнадо” айнан жамоанинг ўзини янчади.

Ҳозир Фликнинг мураббийлик фаолиятидаги бурилиш нуқтаси. У ё ўзини бор ресурсларга мослаштиради, футболини қайта шакллантиради ёки бир-икки мавсумлик “шамол мураббий” бўлиб қолади. 

Мослаша билиш, инқирозларни ички ўзгаришлар орқали енгиш — мураббийнинг ҳақиқий кучини кўрсатувчи энг асосий белгидир. Ҳар қандай шароитда битта тизимга ёпишиб олиш эса — чегараланганлик аломати.

Илтимос, Ханси, сен ахир жуда ақлли ва ажойиб инсонсан — буни уддалайсан!

Ҳаддан зиёд қўшиладиган жойим “Барселона”даги энг кучли ижрочилар сафда бўлгандагина Фликнинг “торнадо футболи” ўзининг асл ҳолатида намоён бўлишидир. 

Қўшилмайдиганроқ жойим Фликни бир услубга ёпишиб олаётганликда айблаш. Балки ҳозирги услубига 1-2 та янги элементлар қўшиб, рискни бироз камайтириши керакдир. Бироқ мавжуд услубдан мавсум давом этаётган бир пайтда воз кечиш, фикримча хато бўлади. Биз кўрдик, “Барселона” “Реал”га қарши у қадар юқорига кўтарилмай, орқароқда кутиб олиб ҳаракат қилганини. Кўпчилик бу учун “Барса”ни танқид қилди ҳам. Хави давридаги каби беозоргина, ноиложгина эди ўша “Барселона”.