Ҳужумчиларни сиғдира олмаётган “Реал” кутилмаган тўпурарни олади

“Реал” бугунги кунда энг кучли ҳужум чизиғи эга жамоалардан бири ҳисобланади. Айниқса, ўтган ёзда жамоага Килиан Мбаппе келганидан кейин олдинги чизиқдаги рақобат янада кучайди.

Бунинг оқибатида универсал ҳужумчи Родриго Гоэс бироз четга чиқиб қолди ва вазият бразилиялик ўйинчининг жамоадан кетиши билан якунланиши мумкин.

Шунга қарамай, “Реал” мутасаддилари келаси мавсум олдидан жамоага яна бир тўпурарни қўшиб олмоқчи.   

AS нашрининг ёзишича, “Қироллик клуби” Анте Будимирни трансфер қилиш имкониятини ўрганиб чиқмоқда. Маълум бўлишича, Хаби Алонсо клуб раҳбариятидан айрим талабларга жавоб берадиган янги ҳужумчи сўраган.

Шу тариқа, Анте Будимир мадридлик селекционерлар эътиборига тушди. 33 ёшли хорватиялик ҳужумчи Испания чемпионати тўпурарлари пойгасида 22 та гол билан Килиан Мбаппе ва Роберт Левандовскидан кейин учинчи ўринни эгаллади.

Будимирнинг “Осасуна” билан шартномасида ҳужумчининг бадал пули 25 миллион қилиб белгиланган. Бироқ бу сумма шу ёзда 8 миллионга тушади.