Испания ва Аргентина ўртасидаги Финалиссима вақти эълон қилинди

2024 йилда икки қитъа чемпионлигига сазовор бўлган Испания (Европа чемпионати ғолиби) ва Аргентина (Америка кубоги соҳиби) ўртасидаги “Финалиссима — 2026” учрашуви келаси йилнинг 28 март куни Қатарда бўлади.

Marca нашрининг ёзишича, ФИФА мутасаддилари бу учрашувни “Лусаил Айконик” стадионида ташкиллаштиришни истаяпти. Захира вариантлари сифатида Саудия Арабистони ва АҚШдаги ареналар танланган.

Футбол тарихида эркаклар ўртасидаги илк Финаллисима 2022 йилнинг июнида ўтказилган эди. Ўшанда Аргентина футболчилари ҳал қилувчи баҳсда Италиянинг 3:0 ҳисобида мағлубиятга учратган.

Эслатиб ўтамиз, 2024 йилги қитъа чемпионатлари финалларида Испания терма жамоаси Англия устидан 2:1 ҳисобида зафар қучган. Аргентиналик футболчилар эса қитъа чемпионатининг охирги ўйинида Колумбиядан 1:0 ҳисобида устун келган.