Криштиану ўғлининг ёшида ундай кучли бўлмаган! Кичик Роналдунинг статистикаси ҳайратга солади! Кичик Роналду "Манчестер Юнайтед" аъзоси!

Шу йилнинг 10 февраль куни Криштиану Роналду (Жуниор) "Манчестер Юнайтед" билан шартнома имзолади. Ваҳоланки, у клуб базасида 2021 йилнинг кузидан бери машғулот ўтказаётган эди.

Футбол оламида отасидан ўзиб кетган футболчиларни кўп учратиш мумкин. Португалиялик афсонанинг ўғли Федерико Кьеза, Эрлинг Холанд, Паоло Мальдини сингари отасидан ўзиб кетадиган даражадаги юлдузга айлана оладими? Бу саволга жавоб бериш мушкул. Бироқ бугунда унинг статистикаси ва имкониятларини чамалаш мумкин.

Испанияда, аммо "Реал" сафида эмас!

Кичик Роналдунинг фаолиятидаги илк жамоаси кўпчиликка яхши таниш бўлмаган "Посуэло" жамоаси бўлган. "Криш" атайин ўз ўғлини камтарин клуб академиясида футбол оламига кириб келишини истади. У шу тариқа фарзандини катта босимдан қутқариб қолишни режалаштирган бўлса ажаб эмас. Шунингдек, клуб базаси Мадриддаги Роналдунинг уйига яқин эканлиги ҳам муҳим факторлардан бири.

Криштианиньо (уни шундай аташади) қанчалар уринмасин, ОАВнинг эътибор марказидан қочишни уддалай олмади. 6 ёш бўлишига қарамай, унинг дебют ўйинида киритган голлари барчанинг эътиборини тортди. Уни машғулотларга кўпинча бувиси олиб борган. Долореш Авейру набирасини ўзгача яхши кўради. Отаси эса муҳим баҳсларнинг деярли барчасини стадиондан кузатган ва ўғлининг футболчи сифатида ўсиши учун маслаҳатларини аямаган. Тан олиш лозим, Роналдунинг танлаган позицияси ҳурматга сазовор. У ўғли танлов қилгунига қадар, уни тўлиқ қўллаб-қувватламоқда. Келажакда бошқа соҳада ўзини кўришни истаса, индамай чекинишга ҳам тайёр.

Роналду ўғлини ажойиб карьера қилишини истайдими?

Криштиану ўғлини профессионал футболчи бўлиши учун қўлидан келган барча ишларни амалга ошириб келмоқда. Сўзимизга кичик Роналдунинг ўзи тўп тепган барча жамоаларда 7-рақамни банд қилгани исбот бўла олади. Афсуски, мана шу омил ҳам Криштианиньони отаси билан солиштириш бошланганини билдиради. Нима ҳам дердик, бошқача бўлиши ҳам мумкин эмас.

"Криш" 2016 йилда ўғли ҳақида берилган саволга қуйидагича жавоб берган эди:

"Албатта, мен ота сифатида уни кучли футболчи бўлишини истайман. Уни дарвозабон эмас, ҳужумчи бўлиши учун керакли кўрсатмаларни бераман, аммо бу у футболчи бўлиши шарт дегани эмас. Катта футбол оламига кириб келиш осон эмас. Шу боис, унга ҳаётини қандай давом эттириш борасидаги саволга жавоб бериш имкониятини тақдим этаман. Унга бу масалада ҳеч қачон босим қилмайман".

Бу сўзлар омма юзини кўрган пайтда, Роналду аллақачон ўғли билан индивидуал машқларни ўтказишни бошлаган эди. Қаҳрамонимиз ижтимоий тармоқлардаги саҳифаларига кўпинча ўғли билан ўтказган машғулотларини жойлаб боради. Бундан ташқари, ўғлининг тўғри овқатланиши ва ўз вақтида уйқуга ётишини ҳам мунтазам кузатади.

Шунингдек, Роналду ўғлининг бўш вақтни қандай ўтказишини ҳам белгилаб беради. У шу кунга қадар ўғлига замонавий қўл телефонидан фойдаланишга рухсат бергани йўқ. "Криш" бу қарорини шундай изоҳлайди: "У мендан доимо қўл телефони сотиб олиб беришимни сўрайди. Лекин бунга руҳсат бермайман. Ҳали у шахсий телефонга эгалик қилиш даражасидан йироқ!" Роналду телефон борасида қаттиққўллик қилганига қарамай, ўғлининг компютер ўйинларидан чегаралаб қўймаган.

Яқиндагина экран юзини кўрган Жоржиньо Родригес ҳақидаги ҳужжатли филмда кичик Роналдунинг компютери акс этган лавҳа бор. Унда бўлажак футболчи ҳозир трендда бўлиб турган бир нечта ўйинларни ўйнагани акс эттирилган.

Нима деб ўйлайсиз? Кичик Роналду каттасидан футболда ўзиб кетиши мумкинми? Фикрингизни изоҳларда қолдиринг!