Мағлубиятдан кейин “Реал” бир гуруҳ футболчиларидан воз кечадиган бўлди

“Реал” футболчиларининг жорий мавсумда қайд этаётган натижалари клуб раҳбариятини безовта қилмоқда. Жамоа Ла Лигада пешқадамликни ашаддий рақиб “Барселона”га бой берди, Европа Чемпионлар лигаси чорак финалининг ҳар икки учрашувида ҳам “Арсенал”дан заифлиги кўриниб қолди.

Relevo нашрининг ёзишича, салбий натижалар айрим ўйинчилар шартномаси бўйича клубнинг қарорини ўзгартириши кутилмоқда.

Хўжайинларнинг шартномаси тугаётган Лука Модрич, Хесус Вальехо, Лукас Васкес ва Давид Алаба билан ҳамкорлик бўйича қарашлари ўзгарди. Булар орасида фақатгина 39 ёшли Модрич янги битимга умид қилиши мумкин.

32 ёшли Давид Алабанинг келажаги июнда янги форматда ташкил этиладиган клублар ўртасидаги жаҳон чемпионатидан кейин ҳал этилади.

“Қироллик клуби” Хесус Вальехо билан хайрлашишга қарор қилганига анча бўлди. 33 ёшли Лукас Васкес эса, ўрнини ёзда клубга келадиган Трент Александер-Арнольдга бўшатиб бериши керак.