Магнус Карлсен: "Бу киберспорт бўйича жаҳон чемпионати"

29 июль – 1 август кунлари мукофот жамғармаси 1 550 000 АҚШ долларини ташкил қилувчи "Esports World Cup Chess" мусобақаси бўлиб ўтди. 

Мангус Карлсен финал баҳсида франциялик Алиреза Фирузжани икки сетда ҳам 3:1, 3:1 ҳисобида мағлуб этди. Учинчи ўрин учун баҳсда америкалик Ҳикару Накамура ҳиндистонлик Аржун Эригайисини 5:3, 5:2 ҳисобларида енгиб, бронза медалига эга чиқди.

Ушбу мусобақада ғалаба қозонган Магнус Карлсен ўз фикрлари билан ўртоқлашди.

"Ўйинимдан мамнунман. Бу форматда доим мувозанат излашга тўғри келади: Бир пайтнинг ўзида ҳам жуда тез, ҳам мукаммал ўйнаб бўлмайди. Шунинг учун мен тезроқ, аммо сифатли юришга ҳаракат қилдим ва бу ишлади.

Бу мен учун янги аудитория. EWCни кузатаётганларнинг кўпи илгари шахматга қизиқмаган. Энг кучлилар қаторида эканимни яна бир бор тасдиқлаганимдан фахрланаман. Ташкилотчилар ва бутун EWC жамоаси турнирни ҳақиқий киберспорт шоусига айлантиришди. Бу шунчаки шахмат бўйича чемпионат эмас, бу киберспорт бўйича жаҳон чемпионати. Биз бу формат қанчалик ҳаяжонли бўлиши мумкинлигини кўрсатдик, деб ўйлайман. Албатта, бу шахматнинг бошқа кўриниши, лекин мен бу форматда ҳам ўзимни намоён қила олганимдан хурсандман", - дейди норвегиялик гроссмейстер.

Эслатиб ўтамиз, Нодирбек Абдусатторов ва Жавоҳир Синдаров ҳам ушбу турнирда дунё юлдузлари билан баҳс олиб борди. Синдаров юришини гуруҳ босқчичида якунлаган бўлса, Абдусатторов чорак финалда Алиреза Фирузжага имкониятни бой бериб қўйди.