"Манчестер Сити" футболчиси Саудияга йўл олиши мумкин

"Манчестер Сити"нинг португалиялик ярим ҳимоячиси Бернарду Силва ўз фаолиятини Саудия Арабистони чемпионатида давом эттириши мумкин. 
 
"Footmercato" нашрининг маълумотларига кўра, 30 ёшли ярим ҳимоячини ўз сафига қўшишдан "Ал-Ҳилол" клуби манфаатдор. Саудия клуби сўнгги бир неча ойдан буён Бернардуни диққат билан кузатиб келмоқда. "Шаҳарликлар" эса ўз навбатида жамоани ёшартириш йўналишини танлаб, футболчини қўйиб юборишлари мумкин. Силва 2017 йилнинг ёзида Манчестер клубига ўтган эди. Унинг "шаҳарликлар" билан шартномаси келгуси мавсум охиригача мўлжалланган. Тransfermarkt порталининг экспертлари футболчининг бозор қийматини 38 миллион еврога баҳоламоқдалар. 
 
Бундан ташқари, Саудия клуби "Милан" ҳимоячиси Тео Эрнандес, "Наполи" форварди Виктор Осимхен ва Криштиану Роналдуга қизиқиш билдираётгани ҳақида ҳам миш-миш хабарлар тарқалаётган эди. 
 
Маълумот ўрнида, португалиялик ҳавбек ўтган мавсум манчестерликлар сафида 49 та беллашувда майдонга тушиб, 5 та гол ва 4 та голли узатмани ўз ҳисобига ёздириб қўйган.