“Манчестер Сити” юлдузи қуйи лигага кетади

“Манчестер Сити” юлдузи Кевин де Брюйненинг клуб билан тузган шартномаси 30 июнь куни якунланади. Клуб раҳбарияти бельгиялик юлдуз билан ҳамкорликни узайтирмоқчи эмас.

Шу боис 33 шли ҳужумкор футболчи ёзда бошқа жамоага кўчиб ўтишига тўғри келади. Сўнгги маълумотларга қараганда, Кевин де Брюйне Саудия Арабистонининг иккинчи дивизионида иштирок этаётган “Неом” жамоаси билан музокара ўтказмоқда.

Бу хабарни тарқатган Footmercato нашрига кўра, томонларнинг биринчи учрашуви ижобий якунланган ва машҳур плеймейкернинг бу клубга ўтиши қизғин муҳокама қилиняпти.

Англия чемпионатининг энг зўр ассистентларидан ҳисобланган Кевин Бельгиянинг “Генк” клуби тарбияланувчиси ҳисобланади. Бу жамоадан кейин “Челси”, “Вердер” ва “Вольфсбург”да   ҳам тўп тепган.

“Манчестер Сити” Кевин де Брюйнени Бундеслига “бўрилари”дан 2015 йили 76 миллион еврога трансфер қилган эди. Гарчи қиммат бўлишига қарамай, бу трансфер ўзини тўлиқ оқлаган. Чунки маҳоратли футболчи жамоанинг муваффақиятларида асосий ролларда бўлиб келмоқда.