Мбаппе аламли ўйинда Роналдуни ортда қолдириб кетди

Испания кубоги финалида “Реал” футболчилари ашаддий рақиб – “Барселона”дан 2:3 ҳисобида мағлубиятга учраб, бош совриндан қуруқ қолди.

Беллашувда мадридликларнинг биринчи голини урган Килиан Мбаппе шахсий кўрсаткичини яхшилаб олди холос.

Франциялик ҳужумчи “Реал”даги дебют мавсумида урган голлари сони бўйича Криштиану Роналду ва Рууд ван Нистелройдан ўзиб кетди.

“Қироллик клуби”га қўшилганидан бери барча турнирларда 51 маротаба майдонга тушган Мбаппе ўз ҳисобига 34-голни ёздириб қўйди.

Мавсум тўлиқ якунлангунга қадар 25 ёшли ўйинчи мутлақ рекорд ўрнатиши мумкин. Чунки дебют мавсум тўпурарлари рейтингида биринчи ўринда турган Иван Саморано ҳисобида 37 та гол бор. Мбаппе янги рекорд ўрнатиши учун яна тўртта гол уриши кифоя.