Миссия бажарилди! "Барса" раҳбарияти Араухони фикридан қайтарди

Хабарингиз бор, "Барселона"нинг муҳим футболчиларидан бири ҳисобланган Рональд Араухо ушбу қишда "Ювентус"га кўчиб ўтишни мақсад қилганди, лекин бу трансфер бўйича кескин бурилиш содир бўлди, яъни ҳимоячи ўз фикрини ўзгартирди. "Relevo" нашри хабар беришича, кеча Деку ва Араухо ўртасида учрашув бўлиб ўтган ва португалиялик мутахассис уни қолишга кўндирган. Уругвай нафақат, жамоани тарк этмайди, балки эндиликда янги шартнома борасида ҳам музокаралар бўлиши кутилмоқда. 

2024 йил ёзида жароҳат олиб, яқиндагина сафга қайтган Рональд таркибда Пау Кубарси ва Иньиго Мартинес тандеми шаклланганидан кейин кам ўйин амалиётига эга бўлиши мумкинлигини сезди. Гарчи, у соғ бўлса ҳам, Флик икки испаниялик ҳимоячини асосий таркибга қўйганидан кейин Рональд кетишни истаб қолди ва "Ювентус" варианти чиқди. Ҳаттоки, туринликлар бош мураббийи Тиаго Мотта ҳам футболчи билан кўришишни режалаштираётганди. 

Деку Моттадан олдин ҳимоячи билан кўришиб олди. Араухонинг шартномаси 2026 йилгача амал қилади. Бу эса "Барса"га босим ўтказиш учун жуда яхши омилдир, чунки клуб уни ҳозир ёки қишда қўйиб юбормаса, келаси йил эркин агент сифатида бошқа клубга бориб қўшилиши мумкин бўлади. Каталонияликлар эса бундай футболчисини текинга қўйиб юборишни истамайди. 

Иньиго "эл-класико"да жароҳат олганди. Айнан унинг ўрнига Араухо майдонга тушиб, ўйинни давом эттириб қўйди. Мартинес кейинги ҳафталарда майдонга туша олмайди. Бу эса Рональд учун кўпроқ ўйнаш имконини беради ва у Фликнинг ишончига кириб олиши мумкин. Испаниялик ҳимоячи сафга қайтганидан кейин эса бошланғич таркиб учун жанг кетади.