МЮ афсонаси АПЛнинг энг зўр футболчиларини санади

Англия терма жамоаси ва "Манчестер Юнайтед" собиқ ҳужумчиси Уейн Руни жорий мавсум Англия Премьер-лигасининг энг яхши футболчилари ҳақидаги фикрини билдирди.

Руни МЮ ярим ҳимоячиси Бруно Фернандешни 5-ўринга қўйди, клуб учун унчалик омадли бўлмаган мавсумда ҳам унинг барқарорлигини алоҳида таъкидлади. 4-ўринни эса "Ноттингем Форест" таркибида "фантастик мавсум" ўтказаётган Морган Гиббс-Уайт эгаллади.

"Учинчи ўрин – Коул Палмер. Сўнгги вақтларда у мавсум бошидаги каби кўп гол урмаяпти, лекин барибир "Челси"нинг натижаларига катта таъсир кўрсатди. Иккинчи ўринга "Ньюкасл" ҳужумчиси Александр Исакни қўярдим, биринчи ўринда эса Муҳаммад Салоҳ. Афтидан, айнан у "Ливерпуль"ни чемпионлик сари бошлаб бормоқда", – дея Руни сўзларини келтирди "Metro" нашри.

Салоҳ ушбу мавсумда барча турнирлар доирасида 47та ўйинда иштирок этиб, 32та гол ва 23та ассист қайд этган.