"Париж-2024" қаҳрамони ўз ватанига қайтди

"Париж-2024" Олимпия ўйинларининг ўқ отиш беллашувларида қатнашиб, ўзига хос қаҳрамонга айланган туркиялик Юсуф Дикеч ватанига миллий қаҳрамон сифатида қайтиб келди. Истанбул аэропортида уни маҳаллий мухлислар ва кенг жамоатчилик вакиллари кутиб олишди. Спортчининг шарафига пойтахт Анқара ва Истанбул шаҳарлари унинг расми туширилган деворий суратлар ва портретлар билан тўла эканлиги айтилмоқда.

Туркиядаги ўқ отиш клубларининг айримлари унинг номи билан ҳам аталмоқда. Айтиш мумкинки, Юсуф Дикеч ҳаётидаги энг машҳур онларини бошдан кечирмоқда. Хаттоки, янги туғилаётган чақалоқларга ундан илҳомланиб, Юсуф исмини қўяётган оилалар ҳам учрамоқда.

"Мен "Лос-Анжелес-2028"га энди фақат олтин учун бораман. Бир неча кун аввал эса, сербларга олтин медални бир муддат қарзга берганимни, тўрт йилдан кейин омонатни қайта олиб кетишимни айтиб ваъда бердим" -дея таъкидлаб ўтган туркиялик спортчи.

Эслатиб ўтамиз, Юсуф Дикеч "Париж-2024" ёзги олимпия ўйинларининг пневматик тўппончадан 10 метр масофага жуфтликда ўқ отиш беллашувларида иштирок этиб, кумуш медални қўлга киритган. Олтин медаль эса, айнан сербиялик спортчиларга насиб этган эди.