Превью. "Андижон" - "Насаф"

“Андижон” 2025 йилдаги ўз майдонида ўтадиган илк расмий баҳсни “Насаф”га қарши ўтказишидан хабарингиз бор. Турнинг мазкур марказий тўқнашувига қизиқиш жуда катта.

15 март оқшомида “Бобур арена”да мутлақо бошқача атмосфера ҳукм суради. Ҳамма орзиқиб кутаётган баҳс Андижонда очилиш ўйинига айланади.

“Андижон” ва “Насаф” қарама-қаршилиги ҳамма вақт барчанинг эътибор марказида бўлиб келган. Шу кунга қадар жамоалар миллий чемпионатда 46 маротаба майдонда куч синашишган. “Андижон”да 7, “Насаф”да 28 та ғалаба бор. 11 та ўйинда дуранг қайд этилган. Тўплар нисбати 50\98 қаршиликлар фойдасига.

“Андижон” “Насаф” устидан сўнгги маротаба 2023 йили Қаршида 0:1 ҳисобида ғалаба қозонган. Шунингдек, Андижондаги “Бобур арена”да “Насаф” охирги бор 2019 йилги мавсумда мағлуб этилган. Ўшанда 3:1 ҳисобида “Бургутлар” устун келган.

Эслатиб ўтамиз, “Андижон” – “Насаф” баҳси 15 март куни “Бобур арена”да соат 19:30 да бошланади.