Қувайт бош мураббийи: "Агар Каннаваро футболчилар билан тезда тил топиша олса, албатта, яхши натижалар қайд этишига ишонаман"

Ўзбекистон - Қувайт ўртоқлик ўйини олдидан меҳмонлар бош мураббийи Элио Соуза матбуот анжуманида иштирок этди. 

"Ўзбекистоннинг сўнгги ўйинларига назар ташласак, бу жамоа нафақат Осиёда, балки жаҳон миқёсида ҳам кучли терма жамоалардан бирига айланганини кўриш мумкин. Таркибида Европанинг топ-клубида ўйнайдиган футболчиси бор. Ҳеч бир футболчини алоҳида ажратиб кўрсатмаган бўлардим — уларнинг ҳар биридан хавф кутиш мумкин. Бироқ бизнинг асосий ишимиз ўз ўйинимизга эътибор қаратиш. Эртага чиройли стадионда майдонга тушамиз ва ижобий натижага эришишга ҳаракат қиламиз.

Фабио Каннаваро илгари Хитой терма жамоасида ишлаган, 2006-йилда эса Италия билан Жаҳон чемпиони бўлган. Агар у футболчилар билан тезда тил топиша олса, албатта, яхши натижалар қайд этишига ишонаман.

Кувайт Яқин Шарқдан Жаҳон чемпионатига чиққан илк терма жамоа бўлган. Ҳозир биз ҳар бир футболчимизнинг ўйинини таҳлил қилиб, Осиё Кубогида муносиб иштирок этишга ва Кувайт футболининг олдинги нуфузини тиклашга интилмоқдамиз", - дедм мутахассис.