Рамос ПСЖ сафида қачон дебют қилади?

Жорий трансфер ойнасида ПСЖ сафига бориб қўшилган Серхио Рамос Франция чемпионатининг дастлабки турларида жамоага ёрдам бера олмайди.

Испаниялик ҳимоячи жароҳатидан тикланиш жараёнини бошдан ўтказмоқда ва бу жараён яқин бир ой ичида тугамайди. "Рамос тикланиш жараёнини босқичма-босқич ўтаяпти, у терма жамоалар йиғинидан кейин сафга қайтиши мумкин",-дейди ПСЖ матбуот хизмати. 

Бундан келиб чиқадики, Рамос Париж клуби либосида 12 сентябрга қадар майдонга туша олмайди. Худди ўша куни жамоа ички биринчиликнинг 4-тури доирасида "Клермон Фут 63"га қарши ўйин ўтказади.

Рамос парижликлар таркибига "Реал"дан эркин агент сифатида келиб қўшилди. У ўтган мавсум "қироллик клуби" сафида 21 ўйинда қатнашиб, 4 та гол урган ва 1 та ассистга эришган.