“Реал” Англия футболи кашфиётини олиб кетади

“Реал” клуби “Манчестер Юнайтед”нинг 19 ёшли ярим ҳимоячиси Кобби Майнуга жиддий қизиқиш билдирмоқда. Бу футболчи яқинда клуб билан янги шартнома тузишдан бош тортган эди.

Defensa Central нашрининг маълум қилишича, мадридликлар Майнуни Англия чемпионатининг энг ёрқин истеъдоди, деб эътироф этмоқда. Бу ўйинчини “Реал” бош скаути Юни Калафатнинг шахсан ўзи кузатиб боряпти.

Манчестерликлар клубда қолишни истамаётган Майнуни сотиб юборишга тайёр. Клуб уни 70 миллион фунтга баҳолаяпти.

Майнунинг амалдаги шартномаси яна икки йил давом этиши белгиланган. Жорий мавсумда у 25 та учрашувда майдонга тушиб, биттадан гол ва ассист қайд этди.