“Реал” Мбаппедан зўр футболчини олиб келишни сўраяпти

“Реал” клуб тарбияланувчиси ҳисобланган Ашраф Ҳакимини яна Мадридга олиб кетиш фикридан қайтгани йўқ. Марокашлик футболчи асосий таркибдан жой берилмагани учун 2020 йили “Қироллик клуби”ни тарк этганди.

Ўшанда 43 миллион евро эвазига “Интер”га трансфер қилинган ўнг қанот ҳимоячиси Италияда бир мавсум ўйнаганидан кейин икки баравар қимматига “Пари Сен-Жермен” клубига сотиб юборилган.

Айни пайтда ўз позициясида дунёнинг энг зўр ўйинчиларидан бирига айланган  Ҳакими Париж клубида 185 та учрашувда иштирок этиб, ҳимоядаги вазифаларини уддалашдан ташқари рақиблар дарвозасини 25 маротаба ишғол қилган ва жамоадошларига 37 та голли пас узатган.

Defensa Central нашрининг ёзишича, мадридликлар Ҳакимини олишда у билан ПСЖда бирга ўйнаган дўсти Килиан Мбаппени ишга солмоқчи. Улар франциялик юлдуз ўз муносабати орқали Ашрафга таъсир ўтказа олади, деган фикрда.

ПСЖ билан 2029 йилнинг 30 июнигача давом этадиган шартномага эга бўлган Ашраф Ҳакими Transfermarkt портали экспертлари томонидан 80 миллион еврога баҳоланмоқда.