“Реал”нинг Винисиусга муносабати ўзгарди, янги шартнома бўйича музокара тўхтатилди

“Реал” раҳбарияти бразилиялик ҳужумчи Винисиус Жуниор билан амалдаги шартномани узайтириш мақсадида музокараларга киришган эди.

Саудия Арабистони клублари 24 ёшли футболчига “ҳужум” қилаётгани боис, “Қироллик клуби” янги битим тузиш масаласини тезлаштирганди. Лекин Винисиус клубнинг биринчи таклифини рад этди ва катта маош сўрай бошлади.

“Реал” хўжайинлари музокараларни музлатди ва ўйинчи билан янги шартнома масаласини 2026 йилнинг ёзида, амалдаги битим якунланишига бир йил қолганда кўриб чиқади.

Винисиуснинг келажагини ҳал қилиш “Реал” ихтиёрида. Чунки мадридликлар 2027 йилнинг ёзигача тузилган шартномада ҳужумчини олишни истаган клублар учун бир миллиард евро миқдорида бадал пули белгилаб қўйган.

Табиийки, бунақа суммани ҳеч ким тўлолмайди. Бу талабни бажарадиган клуб топилган тақдирида ҳам “Реал” ҳеч қандай иккиланишсиз Винисиусни қўйиб юбориши мумкин.