Родриго “реалчилар”га ёқмайдиган гапни айтиб қўйди

Испания чемпионлиги учун кураш одатдагидек, “Реал” ва “Барселона” ўртасида кечиши аниқ. Янги мавсумнинг биринчи “эл-класико”си 26 октябрь куни бўлади.

Ла Лиганинг 10-туридан ўрин олган ушбу учрашувга мадридликлар мезбонлик қилади.

Журналистлар “Реал” ҳужумчиси Родриго Гоэсдан жамоа “Барселона”дан ўтган йилги тўртта мағлубият учун реванш олишга муносабати ҳақида сўради.

- Ўтган мавсумни унутган маъқул. Ўзимиз ҳам юқори даражада ўйнамаганимизни жуда яхши биламиз. Айниқса, бой берилган тўртта “эл-класико”да. Бизга уларга қарши ўйнаш ноқулай бўлган.

Тан олиш керак, ҳозир “Барселона” яхши ўйнаяпти, улар биздан кучлироқ ва ўзига ишончи юқори бўлган жамоага айланган.

Бизнинг жамоа ҳам зўр. Бўлажак “эл-класико” жуда оғир ўтади, лекин “Бернабеу”да ўз мухлисларимиз кўз ўнгида ғалаба қозониб, нималарга қодирлигимизни исботлашимиз шарт. Ҳеч нарсага қарамасдан, бўлажак тўқнашувга пухта тайёрланишимиз лозим. Чунки уйда ўйнаймиз, - дед Родриго Гоэс.