“Сити” ва “Реал” Холанд ва Винисиус рокировкасини амалга оширадими?

“Реал”да бош мураббий Хаби Алонсо ва жамоа ҳужумчиси Винисиус Жуниор ўртасида зиддият келиб чиққанидан кейин аксарият экспертлар бразилиялик ўйинчининг Мадридда келажаги йўқлигини таъкидлай бошлади.

Қимматбаҳо футболчининг хулқ-атворидан келиб чиқаётган муаммолардан қутилишнинг бир йўли сифатида унинг жамоадан кетиши кўрсатилмоқда.

Айни пайтда Винисиус Жуниор Англия Премьер-лигасининг топ-клублари нишонида турибди. Хусусан, “Манчестер Сити” бразилиялик юлдузни анчадан бери кузатиб келади. “Реал” эса, “шаҳарликлар”нинг асосий тўпурари Эрлинг Холандга харидор.

Кейинги пайтда икки гранд клуб бу ҳужумчиларни ўзаро алмашиши мумкинлиги ҳақида турли версиялар тарқала бошлади.

Нуфузли манбалардан бири – Defensa Central  нашри журналистлари бу масалага ойдинлик киритди. Унга кўра, манчестерликлар Эрлинг Холандни ҳеч қандай вазиятда ҳам Винисиус Жуниорга алиштирмайди.

Бошқа манбаларда айтилишича, Хосеп Гвардиола Эрлинг Холандни жамоага фақатгина Ҳарри Кейн олиб келинсагина қўйиб юбориши мумкин экан.