Суперфутболчи “Ливерпуль”нинг учта таклифини рад қилди

Англиянинг амалдаги чемпиони “Ливерпуль” ҳимоя чизиғининг етакчи ўйинчиларидан Иброҳим Конатени ҳамкорликни узайтиришга кўндира олмаяпти.

Инсайдер Экрем Конурнинг маълум қилишича, мерсисайдликлар франциялик марказий ҳимоячига уч бора янги шартнома таклиф қилган ва Конате уларнинг ҳеч бирини қабул қилмаган.

Манбага кўра, ливерпулликлар Иброҳимни қолишга кўндиришдан умидини узгани йўқ ва яна уринишларни давом эттиради.

Бундан ташқари, агар Конате тез орада клуб билан келишиб олмаса, “Ливерпуль” январь ойида 26 ёшли футболчини 50 миллион еврога сотиб юборишга ҳаракат қилади. Чунки жорий мавсум охирида Конатенинг шартномаси тугайди ва эркин агент мақомини олади.

Иброҳим Конате “Реал”нинг асосий нишони ҳисобланади. Кейинги пайтда мадридликлар трансфер сиёсатини ўзгартириб, эркин агент мақомини олиш арафасида турган юлдузларга қаратмоқда. Ўтган мавсумда Трент Александер-Арнольд ҳам “Реал” қизиқаётганини билганидан кейин “Ливерпуль” билан келишувни узайтирмасдан ёзда Мадридга кўчиб ўтган эди.