Суперклуб 80 миллион еврога олган футболчини 5 миллионга сотиб юборди

Англия Премьер-лигасининг етакчи клубларидан ҳисобланган “Арсенал” чемпионатдаги асосий рақобатчиларидан “Челси” дарвозабони Кепа Аррисабалага трансферини эълон қилди.

- Кепа Аррисабалага энди “канонир”. Бу ерга савияни кўтаргани келди, - деб ёзди “Арсенал” клуби матбуот хизмати ижтимоий тармоқлардаги расмий саҳифасида.

Маълумотларга қараганда, “тўпчилар” 30 ёшли голкипер учун “Челси”га беш миллион евродан зиёдроқ пбадал пули тўлаган.

Испаниялик дарвозабон “Атлетик Бильбао” тарбияланувчиси ҳисобланади. “Челси” 2018 йилда 20 миллион еврога баҳоланган бу футболчини олиш учун рекорд сумма – 80 миллион евро тўлаган.

Бир лаҳзада дунёнинг энг қимматбаҳо голкиперига айланган Кепанинг юлдузли онлари жуда эрта сўнди. Тез орада “Челси”га керак бўлмай қолган Кепа охирги икки йилни “Реал” ва “Борнмут”да ижарада ўтказди.

Энди Аррисабалага “Арсенал”да асосий таркибга кириш учун курашиб, ўзининг нималарга қодирлигини яна бир карра исботлашига тўғри келади.