Винисиусга қўполлик ишлатиб қизил карточка олган Ньом нечта ўйинга дисквалификация қилинди?

"Хетафе" ҳимоячиси Аллан Ньом Ла Лиганинг 9-турида "Реал"га қарши кечган учрашувда (0:1) Винисиус Жуниорга нисбатан қўпол ҳаракат қилгани сабабли икки ўйинга дисквалификация қилинди.

77-дақиқада, захирадан майдонга тушганидан атиги 44 сония ўтгач, Ньом қанотда Винисиус билан тўқнашди ва қўлини кўтарган ҳолда "Реал" вингерининг юзига уриб юборди. Бразилиялик футболчи дарҳол ерга йиқилди. Ҳақам Хосе Мунуэра Монтеро вазиятни қайта кўрмасданоқ камерунлик ҳимоячини майдондан четлатди.

"Хетафе" учрашувни саккиз киши билан якунлади — 84-дақиқада Алекс Санкрис ҳам Винисиусга орқадан тўпсиз зарба бергани учун иккинчи сариқ карточка олди.

Қироллик Испания футбол федерацияси (RFEF) Ньомни тўпга етиб бора олмайдиган вазиятдаги тажовузкор хатти-ҳаракати учун икки ўйинга дисквалификация қилди.

Шу тариқа, Аллан Ньом "Атлетик" ва "Жирона"га қарши беллашувларда жамоасига ёрдам бера олмайди.