Винисиуснинг уйида ёнғин чиқди

Мадриднинг "Реал" клуби футболчиси Винисиус Жуниор уйида ёнғин содир бўлди. Ҳодиса футболчи яшайдиган шаҳар четидаги хонадонда рўй берди.

Маълумотларга кўра, бугун тонгда уйнинг подвалидаги саунага ўрнатилган электр симларида носозлик бўлган ва натижада ёнғин келиб чиққан. Саунадаги осма шифт бутунлай ёниб кетган.

Тутун уйнинг икки қаватини тўлдирган, лекин ҳеч кимга зарар етмаган. Винисиус ўша пайт уйда бўлмаган. Иккита ўт ўчирувчи гуруҳ вақтли етиб келиб, ёнғинни тўлиқ ўчиришга муваффақ бўлишган.