Холанд гол уришда Роналду, Месси ва Мбаппени доғда қолдирди

АҚШ мезбонлик қилаётган клублар ўртасидаги жаҳон чемпионати “Манчестер Сити” учун муваффақиятсиз якунланган бўлса-да, жамоа тўпурари Эрлинг Холанд бу мусобақани унутмайдиган бўлди.

Статистика мутахассислари тақдим этган маълумотларга кўра, Холанднинг гуруҳ босқичининг учинчи турида “Ювентус” дарвозасига урган голи норвегиялик футболчига катта рекорд олиб келди.

Ўша куни Холанд фаолияти давомида 370-учрашувда 300-голини урган экан. Бу маррани тез забт этишда 24 ёшли футболчи жаҳон футболи тўпурарлари Криштиану Роналду, Лионель Месси ва Килиан Мбаппени ортда қолди.

ESPN экспертларининг ҳисоб-китобларига кўра, Криштиану Роналду уч юзлик маррани забт этиши учун 554 та, Лионель Мессига 418 та ва Килиан Мбаппега 409 та ўйин керак бўлган.

Айни пайтда Эрлинг Холанд ҳисобида 371 та беллашувда киритилган 301 та тўп бор. Моҳир ҳужумчи бу голлардан 20 тасини “Мольде”да, 29 тасини “Зальцбург”да, 86 тасини “Боруссия Дортмунд”да, 125 тасини “Манчестер Сити”да урган.

Шунингдек, Холанд Норвегия терма жамоасида сафидаги 43 та ўйинда рақиблар дарвозасини 42 маротаба ишғол қилган.