Холанд ўз номини тарихга муҳрлади

Норвегия терма жамоаси ҳужумчиси Эрлинг Холанд 2026 йилги жаҳон чемпионати саралаш босқичи 6-туридан ўрин олган Молдова терма жамоаси билан ўйинда (11:1) пента-трик қайд этиб, ўз номини тарихга муҳрлади.

У жорий асрда жаҳон чемпионати саралашида бешта гол урган биринчи футболчига айланди. ФИФА матбуот хизматининг маълум қилишича, бу 1977 йилдан бери бундай ўйинлардаги илк пента-трик ҳамдир. Бундан 48 йил муқаддам Ҳанс Кранкл Австрия - Малта ўйинида бешта гол урган.

Ушбу ўйиндан сўнг Норвегия 15 очко билан "I" саралаш гуруҳи турнир жадвалида пешқадамлик қилмоқда. Норвегия навбатдаги саралаш баҳсида 11 октябр куни ўз майдонида Исроилни қабул қилади.