"Ювентус"га кераксиз бўлиб қолган Бернардески учун "Барса" 2 та футболчисини беришга тайёр

"Барселона" клуби "Ювентус" форварди Федерико Бернардескини ўз сафида кўрмоқчи. Бу ҳақда Calciomercato нашри хабар тарқатмоқда.

Юқоридаги манбага кўра, каталонияликлар 26 ёшли футболчи эвазига “кекса синьора”га хорватиялик хавбек Иван Ракитич ва франциялик ҳимоячи Самуэль Умтитини беришга тайёр.

Бундан аввалроқ, Бернардески "Юве" устози Маурицио Саррининг режаларига кирмаслиги ва жамоадан кетиши мумкинлиги ҳақида хабарлар тарқалган эди.

Бернардески жорий мавсум “Ювентус” сафида 24 та ўйинда майдонга тушди ва 1 та гол ҳамда 1 та голли узатмага муаллифлик қилди. 32 ёшли Ракитич эса 32 та ўйинда 4 та голга ассистентлик қилди. 26 ёшли Умтити эса 16 та ўйинда иштирок этди.