"Аслида бу йил Ўзбекистонга қайтиш режамда йўқ эди" ёхуд Грузиядаги легионеримиз энди Суперлигада ўйнайди

Грузия чемпионатида тўп сураётган ягона легионеримиз Мурод Тўйчибоев клубини ўзгартиряпти.

Мавсум бошида Кутаисининг “Торпедо” клубига кўчиб ўтган ҳамюртимиз у ерда ўз ўрнига эга бўлди ва доимий равишда жамоасининг асосий таркибидан жой олиб келди.

Шунга қарамай, иқтидорли ҳимоячи бошқа жамоада тўп суришга қарор қилди. У энди ўзимизнинг Суперлигага қайтяпти.

Грузиядаги фаолияти қандай кечди?

- Грузияга келишим бир томондан менга жуда яхши бўлди. Бу орқали статистикамни бир мунча яхшилаб олдим. Барибир Европа футболи бошқача экан. Ҳар жиҳатдан, ўйин томонлама, ички муҳит, футболга бўлган эътибор борасида ҳаммаси юқори даражада. Бу ерга келганимдан мени жуда яхши кутиб олишган. Машғулотлар ва ўйинлар орқали ўзимни ҳам яхши томондан кўрсатишга ҳаракат қилдим. Шунинг эвазига мураббийлар ва футболчилар билан ҳам яхши тил топишиб кетдим. Бу ердаги инсонларга, жамоадошларим ва мураббийларга катта раҳмат айтаман. Менга Грузия давлати ва “Торпедо” клуби ёқди. Таассуротларим кўп, ҳаммасини айтсам гап тугамайди. Мен учун ярим йил зўр ўтди.

тўйчибоев1

Қандай қийинчиликларга дуч келди?

- Тўғри, Грузияга борган илк пайтимда озгина қийналганман. Қайси томонлама? У ерда бир ўзим эдим. Хонада ҳам ёлғиз бўлгандим, шеригим бўлмасди. Кейинчалик жамоага мослашдим, футболчилар билан яхши чиқишиб кетдим. Натижада жамоадошларим тез-тез хонамга келишарди ва мени зериктирмасдилар. Клубдаги йигитларни кўнгли очиқ, яхши футболчилар. Бош мураббий билан ҳам муносабатим жуда яхши. Айнан у кўпроқ мени қўллаб-қувватларди. Грузияни одамлари меҳмондўст, сира ёмон кўз билан қарамайди. Кейинчалик ёнимга оилам келди. Шундай қилиб, ҳаммасига тез мослашиб кетдим. Ортиқча қийинчилик кўрмадим деб ўйлайман.

туйчибоев1_1

Нега Таиландга кетмади?

- Ҳа, хизматимга Таиланддан таклиф бўлди. Агентим менга алоқага чиқиб, ўша ерни клубидан чорлов бўлаётганини айтди ва нима дейсан, борасанми, деб сўради. Албатта, Таиланд варианти бўйича фикрим ижобий эди. Чунки ажойиб мамлакат, тўловлари ҳам яхши. Аммо кейин ўйлаб қарасам, мени таклиф қилаётган жамоа иккинчи лигада қатнашарди. Мен эса Суперлигасида ўйнашни хоҳлагандим. Иккинчи лигасига боргим келмади. Шу боис бу таклифни бекор қилдик. Европа чемпионатларининг бирида асосий лигасида ўйнаб туриб, Осиёнинг иккинчи лигасига бориб тўп суриш нотўғри деб ўйладим. Шу боис бу борада танлаган қарорим тўғри бўлди деб ўйлайман.

Ўзбекистондан тушган таклифлар ҳақида

- “Торпедо” клуби билан ҳали келишувимиз бор. Бир йилга шартнома тузганман. Худога шукр, бу ерда ёмон бўлмадим. Янги дўстлар орттирдим. Тажрибамни оширдим. Барибир қачондир Ўзбекистондан таклиф тушса, ўзимизга қайтиб ўйнашни дилимга тугиб қўйгандим. Ўзбекистон Суперлигасида охирги марта адашмасам уч йил олдин ўйнадим, шекилли. Менга ўзимиздан таклифлар бўлиб турибди. Хабарингиз бор, “Андижон” алоқага чиқди. Бу томондан эса “Сурхон”. Футболчини қайси таклиф қониқтирса, ўша ерга боришни истайди. Худо хоҳласа, “Сурхон” жамоаси билан келишувга эришдик. Ота-онамни ёнида, ватанимда яна бир бор ўзимни кўрсатиш ниятим бор. “Сурхон”ни танлаганим нотўғри қарор деб ўйламайман.

туйчибоев2

Суперлигамиз хусусида

- Тўғри, Грузияда ўйнадим, аммо бу ҳали етарли деб ҳисобламайман. Келажакда бундан ҳам кучлироқ чемпионатларда тўп суриш ниятим бор. Албатта, Ўзбекистон чемпионатида тўп суришни истаяпман. Ҳар холда ўз ватанингизда, яқинларингиз ёнида бўласиз. Ўзимизни чемпионатимиз ҳам яхши, ёмон эмас. Уч йил четда юрдим. Барибир ота-она ва яқинларингизни соғинасиз. Ҳаёт тарзини ўзгартириб, ярим йил бўладими ёки бир йилми, ўзимизни чемпионатда тўп суришни хоҳладим. Қолганини вақт кўрсатади.

Нега “Сурхон”ни танлади?

- Аслини олганда, бу йил Ўзбекистонга қайтиш режамда йўқ эди. Бу нарса тўсатдан бўлиб қолди. Биринчи бўлиб менга “Андижон” жамоаси алоқага чиқди. Тўғриси, улар билан бир тўхтамга кела олмадик. “Сурхон” жамоаси ҳам менга алоқага чиқди. Ўйлаб қарасам, бу клубни вазияти “Андижон”никига қараганда яхшироқ. Шу сабабли “Сурхон”ни танладим. Ўйлайманки, ҳаммаси яхши бўлади ва жамоанинг ғалабаларига ҳиссамни қўшмоқчиман.

тўйчибоев3_1

“Торпедо”дан кетиши қийин кечмадими?

- Грузия клуби билан шартнома имзолаётганимда келишув бўлган. Агар иккинчи даврада менга яхшироқ вариант чиқса, кетишимга қаршилик кўрсатмайсизлар, деган оғзаки келишувимиз бор эди. Раҳбарлар ва мураббий билан шундай келишганмиз. Юқорида айтдим, бош мураббий билан муносабатим жуда яхши. Шу боис “Торпедо”дан кетаётганим қийин бўлмади. Тўғри, клубдагилар мени қолишимни истади, жамоа учун керакли футболчилигимни айтдилар. Жамоамнинг барча ўйинларида иштирок этиб келаётгандим. Шунинг учун кетишимни истамагандилар. Аммо ҳаёт шунақа. Ҳали ҳаммаси олдинда.

Ойлик маошлар ўртасида фарқ каттами?

- Ойлик маошларга келсак, “Торпедо”га қараганда,” Сурхон” клуби менга кўпроқ тўлайдиган бўлди. Лекин мен Термиз жамоасига биринчи навбатда пул учун келаётганим йўқ. Аксинча, юқорида айтганимдек, ота-онамни ёнида бўлгим келди. Грузияда маошлар ҳар хил. Футболчиларга иш ҳақларини кўп ва оз тўлайдиган клублар бор. Бизнинг жамоа – “Торпедо” бу борада ўртамиёна эди. Кутаисида қанча ойлик маош олганим сир бўла қолсин. Аммо шароитлар яхши эди, мен улардан розиман.

туйчибоев_1

Унга Грузиядан яна таклиф бўлдими?

- Ҳа, албатта менга Грузиядан таклиф бўлди. “Телави” деган клуби қизиқиш билдирди. Аммо менга Ўзбекистон маъқул. Бу ҳозирча, кейинчалик яна Грузияга қайтиб футбол ўйнаш ниятим бор.

Янги клубига қачон қўшилади?

- Тошкентга 23 июль куни қайтаман. Клубга келсак, “Сурхон”нинг мақсади катта. Авваламбор жамоани Суперлигада сақлаб қолиш асосий вазифа ҳисобланади. Чунки “Сурхон”нинг тўплаган очкоси у қадар кўп эмас. Ҳамма ўйинда бор кучим билан ўйнаб, жамоамга фойдам тегишини хоҳлайман.

Фикрлар

Фикр қолдириш учун авторизациядан ўтинг!