Фарғона вилояти ҳокими: "Нефтчи"га Осиё Чемпионлар лигасида ўйнаш ярашади"

“Нефтчи”нинг ўз майдонида Самарқанднинг “Динамо” жамоасини 2:1 ҳисобида мағлубиятга учратгани ва шу тариқа про лига ғолибига айлангани катта шодиёнага айланиб кетди.

Фарғона вилояти ҳокими Хайрулла Бозоров ҳам учрашувни бевосита стадионда кузатди ва ўйиндан кейинги тақдирлаш маросимида ҳам қатнашди. Вилоят раҳбари сўзга чиқиб мухлисларга шундай деди:

“Мавсум аввалидаги тақдимотда сизлар билан яхши ният қилгандик. “Нефтчи”га Суперлигада иштирок этиш ярашади, “Нефтчи”га Осиё Чемпионлар лигасида ўйнаш ярашади! Бугун биринчи ниятимиз амалга ошди.

Худо хоҳласа, келгуси йилдан севимли жамоамиз Суперлигада қатнашади. Бугун ҳаммамиз яхши ният қилайлик, жамоамиз Суперлигада муносиб қатнашиб, мухлисларимизни хурсанд қилсин. Кейинги йилларда Осиё Чемпионлар лигасида қатнашиш насиб қилсин.

Барча фарғоналик мухлисларни, юртимиздаги “Нефтчи” ишқибозларини бугунги ғалаба билан яна бир бор муборакбод этаман. Жамоамизнинг фаолиятига омад тилаймиз.

Шу фурсатдан фойдаланган ҳолда “Динамо” жамоасига чиройли ўйин кўрсатгани учун раҳмат айтамиз ва уларни ҳам Суперлига йўлланмасини қўлга киритгани билан табриклаймиз”.