Жошуа Паркерни мағлуб қилиб, чемпионлик камарларини сонини 4 тага етказиб олди

Британиялик боксчи Энтони Жошуа камарларни бирлаштирувчи чемпионлик жангида янгизеландиялик Жозеф Паркерни мағлуб қилди. Мазкур тўқнашувдан олдин Жошуа Бутунжаҳон бокс ассоциацияси (WBA), Бутунжаҳон бокс федерацияси (IBF) ва IBO камарларига эгалик қилиб келаётган бўлса, Паркер Бутунжаҳон бокс ташкилоти (WBO) титулини ҳимоя қилиб келаётган эди.

Жанг Кардиффдаги “Принсипалити” стадионида ташкил қилинди ва 12 раунд давом этган қарама-қаршилкда Жошуа рақибидан – 119:109, 118:110, 118:110 ҳисобларида устун келди.

Шундай қилиб, 28 ёшли Жошуа профессионал рингда фаолиятидаги 21-ғалабасини нишонлаб, мағлубиятсиз юришини давом эттирмоқда. У бундан олдинги барча жангларини муддатидан олдин якунлаган.

26 ёшли Паркер эса фаолиятидаги илк мағлубиятни қабул қилиб олди. Унинг ҳисобида яна 24 жанг бўлиб (18 нокаут), барчасида зафар қучиб келаётган эди.

Жошуа ва Паркер ўртасидаги тўқнашувнинг андеркард жангида россиялик Александр Поветкин 5-раундда британиялик Дэвид Прайсни нокаутга учратди. Бу билан Поветкин Жошуа эгалик қилаётган WBA камарига даъвогарликни ўзида сақлаб қолди.

Тахминларга кўра, Поветкин ва Жошуа ўртасидаги жанг кузда Россияда бўлиши мумкин.