Арда Туран фаолиятини қаерда тугатмоқчилигини айтди

Каталониянинг "Барселона" клуби ҳужумкор ярим ҳимоячиси Арда Туран ўзининг келажаги борасида якуний қарорга келди. Туркиялик футболчи "Барселона"да қолиб, фаолиятини айнан "кўк-анор ранглилар" сафида якунламоқчи. 
"Мен "Барселона"да жудаям бахтлиман. Хитойдан супер таклифлар бўлаётганига қарамай жамоамни алмаштирмоқчи эмасман.
Айни дамда "Барселона" билан шартномам бор ва мен мана шу келишув сўнггига қадар шу ерда қолмоқчиман. Фаолиятимни "Барселона"да якунлашга умид қиламан. 
Ҳозир мен дунёнинг энг зўр клубида тўп суряпман ва бу жамоанинг бир қисмига айланишни истайман", - дейди Туран AS нашрига берган интервьюсида.

Эслатиб ўтамиз, аввалроқ  Арда Туранга бир қатор Хитой жамоалари жиддий таклифлар юборгани ҳақида хабарлар тарқалган эди.