Бэйл ва Варан "Реал" машғулотларига қўшилишди, улар бугун Рашидовнинг жамоасига қарши ўйинда иштирок этишлари мумкин

Мадриднинг “Реал” клуби бош мураббийи Зинедин Зидан бугун клублар ўртасидаги жаҳон чемпионати ярим финали доирасида бўлиб ўтадиган “Ал-Жазира”га қарши баҳс олдидан жамоасида кадрлар муаммоси йўқлиги ҳақида айтиб ўтди.

“Сўнгги икки кундан буён Бэйл ва Варан жамоанинг асосий таркибида машғулотларда иштирок этишмоқда. Кўрамиз, улар бўлажак баҳсда иштирок этишадими ёки йўқ. Мен учун қувонарлиси, айни дамда жамоамдаги барча футболчилар соғ”, - дейди франциялик мутахассис.

Эслатиб ўтамиз, “Ал-Жазира” ҳамда “Реал” жамоалари ўртасидаги баҳс бугун Тошкент вақти билан соат 22:00да бошланади. БААликлар таркибида ҳамюртимиз Сардор Рашидов ҳам бор. Умид қиламизки, ўзбекистонлик футболчи бугун “қироллик клуби”га қарши ўйинда иштирок этади.